Təkfiri cərəyanon

Təkfiri cərəyanon

Təkfiri dastə DAİŞ bəştə səhvə nəzə əsos,şiəyon bə peyğombər(s) iyən Xıdo ovliyaon təvəssuli dəlili xoto, çəvon xuni mubah zıneydən.DAİŞ-i sabiğ sıxanəvot  Muhəmməd Ələdnani çın barədə jıqo votedə: ”şiəyon bəpe kıştey bıbu.əvon bə Əbbos(ə) iyən Fatimə(s) təvəssul kardedən.əvon mışrikin.bəçəvon kəon daxil bıbənən və çəvon səon çəvon bədəmiku cokənən”.təkfiri vəhhabiyon bə Xıdo təğərrıbi vositə fəğət ilahi əsma və nomon zıneydən və coqlə təvəssıli şırk hisob kardedən.ım qıləy holədəy ki,Kərimə-Ğıron iyən islomi-peyğombər(s)-iku rəsə rəvoyətonədə çı təvəssıli həxədə ziyodə sənədon mevcude.   ım qıləy holəy ki,Kərimə-Ğıronədə və islomi peyğombər(s)-i rəvoyətonədə çı təvəssıli həxədə ziyodə sənədon mevcude.Kərimə-Ğıroni ayəonədə mışohidə kardedəmon ki,qıləy saleh və ləyoğətinə insoni Xıdovəndi dərqoyədə bıə məğam və Xıdovəndiku deçəy vositə qıləy çi tələb kardey,de tohdi hiç qıləy ziddiyyətış ni.

Xıdovənde-Aləm maidə mıborəkə surə 35-ə şərifə ayədə boştə vositə ğərol doey roonış nışon doə.jıqo ki, hamyedə:”Ya əyyuhəlləzinə....ha imon vardə kəson ha! bə Xıdo pemandənən və bəçəy səmt (bo təğərrıbi xoto)vositə dumo bıbən və çəy royədə cihodkənən,ğasbu şımə nicot pəydukon”.coqləyni nımunə  Yəğub(ə)-i zoon bəştə pı bıə təvəssıle ki,Yusifi mıborəkə surə 97-98-ə ayəonədə omə:ğalu ya əyyuhə.... voteşone ha pı ha!boçəmə qınon xoto,(Xıdoku)məğfırət tələbkə . (Yəğubi) voteşe bə rəyrə boşımə məğfırət tələb bəkardem ki,bərosti əv əbaxş və mehribone”.

In ayəon çəyku hikoyət kardedə ki,Yusif(ə)-i boon de Yəğub(ə)-i Xıdovəndi miyono vositə ğərol doey, çəyku boştə məğfırət tələb kardedən.əvon bə Xıdo dərqo nez bıə ıştə pı Yəğub(ə)-iku tələbışon karde ki, boəvon Xıdo palu şifoət iyən məğfırət tələbko.həzrəte Yəğub(ə)-i ilahi peyğombəronku be,jıqo qıləy şəfoətış rədd nıkarde və əə həzrəti nıvoteşe ki,ım ko eynən şırk və hərome və şımə ıştən bə Xıdo dərqo bışənən və ıştən çəyku ıştə məğfırəti tələbkənən.bəlkəm,voteşe ki,rəyrə şımə Xıdovəndi dərqoyədə boşımə məğfırət tələb bəkardem.çən,bə Kərimə-Ğıroni şərifə ayəon əsos,boştə qınoon baxşey xoto,bə Xıdo ovliyaon təvəssıl kardey  bəzıneyn və əvon Xıdo dərqoyədə təğərrıbi vositə bıey bəzıneyn. həlbəttə, ım nuktə həm rosneydə ki,peyğombəron bə Xıdovəndi palu barzə məğami soyb bıey xoto,əve əvoni Xıdovəndi palu vositə ğərol doey mumkine.....

Nisa mıborəkə surə 64-ə şərifə ayədə çı təvəssuli həxədə bə qıləy co nuktə işorə kardedə:və ma ərsalnakə......və əmə hiç qıləy rəsulımon nıvğande ki,illa de Xıdo izni bə əmri tabe bıbon və ehanə əvon bəştə sıtəmkon,ıştı plau bomeyn və Xıdovəndiku məğfırət tələbkon və peyğombər həm boəvon məğfırət tələbko,hukmən Xıdo tovğə ğəbuləkə və mehribon bəvindeyş”.bə ın ayə əsos,bə Xıdo dərqo nezəti iyən qınoon baxşey roonku qıləyni bə Xıdo-Rəsul(s)-i təvəssıl kardey iyən əvoni çı Xıdo miyono vositə ğərol doeye.liza,çı xətokor iyən qınokoronku tələb kardedə ki,çı peyğombər(s)-i palıu bışon və çə həzrəti dıvo boştə qınoon baxşeyro vositə ğərol bıdon ta əvon baxşey bıbon.çın ayəku ım nəticə seydəmon ki,boştə qınoon baxşey və əvoni vositə ğərol doey xoto,bə peyğombər(s)-i  təvəssıl kardey,komilə surətədə Kərimə-Ğıroni təsdığ kardə vıronkuye.iyo çı vəhhabiyon şubhəku bəhs beydə və əvon iddio kardedən ki, peyğombər(s) ıştə rehləti bədiqə həni bo hiçkəsi dıvo kardey əzınin.Ali-İmrani mıborkə surə 169-171-ə şərifə ayəonədə dığğət kardəninə nuktə bə çəş çiyedə.joqo ki, hamyedə:”və la təhsəbənnə...və hiçvaxti qımon məkə Xıdo royədə kıştə bıə kəson mardən,bəlkəm əvon bəyjin və ıştə pərvərdıqori palu ruzi doey beydən.Xıdo fəzl iyən rəhmətiku bəvon nəsib bıə çiy xoto,əvon şoon və bo çəvon peşto bıə kəson  və hələm bəvon anqıl bıənin,şoyvonəti kardedən(və bəvon bəşorət doydən) ki,nə boəvon tars heste və nə qıləy ğəmqinəti və de Xıdo fəzl iyən neməti və çun Xıdovənd  çı muminon əcri zay nibəkarde,əvon şo iyən məsrurin”. Səudiyyə rejimi yolə mufti votedə:çı təvəssıli hurmət iyən həroməti ıme ki,de peyğombəri(s)-i rabitə maqi bədiqə de ın aləmi ğət və bırniye beydə və əv bo ikəsi dıvo kardey nibəzıne və çı har qıləy ko əncom doeyku ocize.

Əmmo Kərimə-Ğıron ım nəzə de şiddəti rədd kardedə və bəçəmə işorə ayəon dığğət kardə holədə sərəsimon ki,şəhidon bəyjin və bəvon çəvon pərvərdıqori palu ruzi doey beydə.ın ayəon həm çı şəhidon şoyvonəti tovsif kardedə.əvon çı bəyjiyə fərdon hol-əhvoliku aqahin və çı bəyjiyə şəxson bəvon anqıl qıniye intizorədən və bəvon qıləy ruşinə mıjdəvoni iyən bəşorət doydə.ısət çokonə mumkine ki,çı torıxi qırd şəhidon məğamisə barzə məğami soyb bıə  peyğombər(s) ıştə rehləti bədiqə bo har qıləy ko əncom doey ocize və bo ikəsi dıvo kardey əzıni və bəy təvəssıl kardey şırk iyən hərome.