Təkfiri cərəyonon

Təkfiri cərəyonon

Qıləy holədə ki,təkfiri terroristə qrupon de islom iyən deçəy təlimon hiç qıləy nisbətış ni və Kərimə-Ğıron iyən islomi peyğombər həzrəte Muhəmməd(s) sınnət və ğanunon  nəzəku çəvon kardə koon vey yol və əfv nıbə qononkuye.”Fətk”-i kəlmə rəvoyətədə ənəxəbədo kıştey mənoədəy ki,ımrujnə oko doə bıə kəlməonədə bəy terror votey beydə.rəvoyətədə nəğl bıə ki,Əbu Misbah Kənani bə İslomi peyğombər(s)-i nəvəonku qıləyni və çı şiəyon şəşminə imom bıə İmom Sadığ(ə)-i  ərzış karde:çımı qıləy hamsuyəm heste ki,bə Əmirəl-Muminin Əli(ə)-i dıjmon doydə.şımə icozə bıdənən ki,az çəy ratədə bınıştom və əy bıkıştom.ə həzrəti həmonə odəmış çın koyku nəhyış karde və hamyeşe:”ya əba Səbbah.......ıştı votə ım sıxan fətke və Xıdo-Rəsul(s)-i fətkış nəhy kardə”.

Coqlə hodisə həm çı terrori ğədəğən bıey barədə bıə islomi dini yolon mevğıyyəti ruşin kardedə.Cəməli canqədə Zubeyr ibn Əvam ki,çı həzrəte Əmirəl-Muminin Əli(ə)-i mığobilədə bıə mandə cəbhə sərkərdə be,canqi şiddətinə zəmonədə meydoniku fərolış karde,vite.qıləy fərdi əvış təğib karde və roy nimədə ənəxəbədə əvış bə ğətl rosne.həzrəte Əmirəl-Muminin Əli(ə) çın mevzuku xəbədo bıey bədiqə vey norohət be və hamyeşe:çəy ğatil bə cəhəndımi əzobi giriftor bəbe.çun,bə qıləy koş dast je ki, peyğombəri(s) əvış nəhyış kardə”.....

Peyğombər(s) sınnət və siyrə bə terrori ğədəğən bıey təkid kardedə.Peyğombər(s) hiçvaxti ıştə deşmınonış terror nıkarde və bə hiçkəsi jıqo qıləy koy icozəş nıde.demiyən fərdon ənəxəbədə kıştey və terror kardey  ğədəğəne.ikəs ki,qıləy fərdi kuçə və xiyobonədə terrorko ya çı camaati dəvardə royədə bombə bıno ya de kamikadze roy vositə vıjor,məçit və co iştimoyi məkanonədə idastə beqınoə odəmon bıkışto ımon həmmə çı terrori oşkoə mənoku bə hisob omeydə.islom qırd ım hərəkəton de şiddəti məhkum və rədd karadedə.ım ko bə vırə rosnə kəson həm ğatil,cinoyətkor və canqəkə  zıneydə.islomi dini rəhbəron vey fosid iyən sıtəmkor ki,çəvon kıştey həm cayize,deçəvon ratədə nıştey və əvoni ənəxəbədo bə ğətl rosney ğəbul bıənin hisob kardedənin və deəy ıştə mıxolifətışon nışon doə.ısət bəpe dəparsəmon ki,aya jıqo din icozə doydə ki,kuçə və vıjoronədə bıə beqınoə jen,hırdənvə co addi milləti  ,məçitonədə bıə nımojəvoton və co şəhr və diyon əhali de idastə terroriston dasti kıştey və ğətl-am bıbu? qıləy zəmon ki,”məhdumudəm” yəni çəy kıştey həlol bıə ikəsi de terrori roy vositə cayiz hisob kardedəni, ısət çəy xun ehtıromin bıə insoni terrori və de Kərimə-Ğıroni təbiri çəy kıştey de qırd zəmini dimisə bıə insonon kıştey bərobəre,əy kıştəkəsi əzob dı bərobər bəbe.

Islomədə har  nev ğətl ki,de terrori roy bə əməl omeydə,ğədəğəne və çəy qıləy şiddətinə əzobış heste. bəpe bə  milləti əmniyyəti de hozi iyən silohinə hərəkəti bəyənde jıə təkfiri  terroriston icozə doey nıbu ki,əvon ozodə şikilədə şəhr və kişvəronədə rohət şıe-omeykon və umumən jıqo fərdon  bəpe qıləy əmniyyətışon nıbu.çıro ki,çı terroriston ozodəti iyən əmniyyət çı umum milləti ozodəti iyən əmniyyəti çəvon dastiku sıey mənoədəy və bə həmonə dəlili xoto,Ğıron de əvon ğətiyyətinə şikilədə rəftor kardey tələb kardedə....

Təkfiri dastəon cinoyətonku qıləyni həm çəvon ıştə mıxolifon işkəncə kardey və çəvon bədəmi uzvon bırniyeye.ım cinoyəton həm de şiddəti dini islomədə nəhy bıə.islomi fiğhədə çı işkəncə və əzob-əziyyəti barədə əksərən “tə`zib”-i kəlməku oko doey bıə.bə islomi ayini əsos hiçkəsi həxış ni bə coqlə insoni və əy bə əzob-əziyyəti məruz bəhaşto və ımko ğədəğəne.Xıdovənde-Aləm Kərimə-Ğıronədə Buruci mıborəkə surə 4-ə şərifə ayədə bə muminon əzob-əziyyət iyən işkəncə yavəti iyən çəvon bə Xıdovəndi ğəzəbi dıço bıey nışon doeyro,hamyedə:”ğutilə əshabul-uxdud” bə(otəşi)çolə odəmon işkəncə doəkəson bımardo”. 10-ə ayədə həm bə jıqo curm iyən cinoyəti mırtəkib bıə kəson barədə həm hamyedə:”əlləzinə ğətəlu... əkəson ki,bə muminə merd və jenon işkəncə doydən,peşo tobəşon nıkarde,çən,boəvon cəhəndımi əzob və sutunə otəş heste”.həmçinin Əhzabi mıborəkə surə 58-ə şərifə ayədə bə mısılmınon əzob-əziyyət doey qıləy oşkoə qıno hisob kardedə.joqo ki,hamyedə:”vəlləzinə yuzunə.......və əkəson ki, bə hiç qıləy xətoə ko əncom nıdoə muminə merd və jenon əziyyət doydən,beşək qıləy oşkoə behton iyən qıno (boşon) bəştə qıy peqətəşone”.qıləy camaat ki, bə təkfiri terroriston həmlə məruz mandən,hiç qıləy qınoşon bə vırə rosnəni ki,jıqo bə ım cinoyətkorə dastəon qırd işkəncəon məruz bımandon.ın ayə de qıləy məxsusə təbiri bə muminə merdı-jeni işkəncə və əzob-əziyyət doydən,de şiddəti mızəmmət bıə....