Təkfiri cərəyonon

Təkfiri cərəyonon

İslomi din anədə mehribone ki,hətto de heyvonon rəftor kardey formə və çəvon vəzifə iyən həxon həm nəzədə qətey bıə.çokonə jıqo humanist iyən sulh tələbəkə din,çı təkfiri iyən terroristə dastə bıə vəhhabiyon kardə koon  ğəbul kardey bəzıne.islomi erjon,təlim iyən təlimoton bə insoni kəromət iyən həxon əsos təsis kardey bıə.islomi dini təməl həm bə insoni kəromət və həxon əsos mıəəyən bıə.bə islomi rəyrə çı Hicazi nimə cəzirəku xaricədə pevolo bıey boyis bıə çi,çı Xıdo-Rəsuli(s)  mehribon iyən kərimonə rəftor be.Xıdovənde-Aləm Kərimə-Ğıroni Ənbiya mıborəkə surə 107-ə şərifə ayədə jıqo hamyedə:”vəma ərsəlnakə....əmə tımon bo aləmon ğərəz rəhməti co çi vığandəmon ni”.rəhməti məfhumi qıləy hevujə mənoş heste ki,aləmi qırd mevcudaton həmmə əsr iyən  ğərnonədə və hətto bə qırd məlayikon həm şomil beydə.çoko ki,ın ayə nozil be.peyğombər(s) Cəbrəyiliku dəparsəşe:”həl əsabəkum......aya çın rəhmətiku bətı qıləy çi şomil be?Cəbrəyil voteşe:bəle,mı ıştə koy oxoyku tarsım heste.əmmo,bəşmə xoto ki,şımə bo aləmon rəhmət vığandə bıəyon,ıştə vəzyətiku xotırcəm bıəm.....

Xıdovənde rəbbul-aləmin həzrəte Muhəmmədış(s) de rəhmətən lil aləmin nomi vığandəşe və məbusış kardə.çoko ki,Xıdovəndi rəhmoniyyəti sıfət umumiye  və ım sıfət bə umum məxloği ısət çı mumin bıbu ya kofir şomil beydə,peyğombəri(s) rəhmət həm bo həmmə insonon  ısət har əsr və məkonədə həm bıbu və de tosə dınyo oxo şomil bəbe.ə həzrət nəyinki,fəğət boştə dini tərəfdoron və duston ,bəlkəm bo qırd aləmon əhli ısət çı çok bıbu ya bəd və ya dust bıbu ya deşmın,bəpe ım mehribonəti və rəhməti hisskon. dınyo  umum millət  ısət çı mumin bıbu ya kofir,həmməkəs bə ın rəhməti ğarzıxon.boçi ki,islomi ayini pevolo kardey bə həmməkəsi nicot və xilosi boyis bəbe.ısət i dastə çəyku okoş doə və iqrup həm istifodəşon kardəni,ım bə fərdon ıştəni məxsuse və bə Peyğombəre-Əkrəmi bo umum məxloği rəhmət bıey hiç qıləy təsir noydəni......

Səhih bənə ımiye ki,de mahirə doktoron iyən mıxtəlifə damonon bə ico bo həmmə dard və dojon qıləy məxsusə noxəşxonə təsis kardey bıbu və çəy bəon hiç qıləy tafut nınoə holədə bo həmmə kəsi dimi oj kardey bıbu.əmmo,kali noxəşon çın imkonatonku oko bıdo və bəzi qıləyni həm çəyku istifodə nıkon.aya ım çəy umumi beyədə qıləy mənfiyə təsirış heste? de qıləy co təbiri bo həmmə aləmon peyğombər(s)-i vucudi rəhmət bıey qıləy təbiiyi iyən oşkoye.bə həmonə dəlili xoto,islomi dini ğəbul kardeyədə həm hiç qıləy məcburiyyət mevcud ni.çoko ki,Bəğərə mıborəkə surə 256-ə şərifə ayədə omə:”la ikrahə...dini ğəbul kardeyədə hiç qıləy ikroh və icbor ni.beşək ruşdi(səhihə)ro zəlolətiku ruşin(oşko)bıə”.əmmo islom bo aləmon bə vohidə Xıdo ayini səmt bıə çorə ro,de islomi nomi təkfiri terroriston bə vırə rosnə çiyon ziddiyyət təşkil doydə.Nəhli mıborəkə surə 125-ə şərifə ayədə bın barədə omə:”(ha məxloğ ha!)de çokə hikmət iyən pandi bəştə pərvərdıqori roy dəvətkə və de əvon de vey çokə şivə mıcodiləkə(bəhs və mınozirəkə)”. Təkfiri terroriston deştə hoziyə şivəon min cumlə de edom,qərdən jıey və de vəhşiyonə əməlon bəştə iddio əsos,deəvon həməğedə nıbıə mısılmınon vəya ğeyri-mısılmınon bə dini səmt dəvət kardedən.ım qıləy holədəy ki,bə həmonə ayə əsos,dini islom  aləmi əhli bə Xıdopərəstəti səmt de hikmət,pand iyən çokə moyizə və de istidlol və məntıği bə ico bıə həmməysə çokə şivə dəvət kardedə......

Xıdo-Rəsul(s) siyrə və şivə həm bo islomi dini tərədoron  ziyodə təlimon ıştədə ehtivo kardedə. peyğombər(s) bə milləti nisbətədə de buzurquvarə formə rəftor kardedəbe və çəvon bə ə həzrəti bıə behurməti bə çəş vardedənıbe və çı cokəson taxsiku de rahətə formə dəvardedəbe.ə həzrət çı huiçkəsi kin-kudurəti ıştə dılədə oqəteydə nıbe və çəyku intiğom sıey dumo nıbe.peyğombər(s) əfv və baxşeşi bəsə intiğomisə bənav və tərcih qəteydəbe.həzrət Əmirəl-Muminin Əli(ə) hamyedə:”kanə rəsulullah.... Xıdo-Rəsul(s) bəsə həmə kəsisə vey əbaxş be və de milləti muaşirətədə bəsə həmmə kəsisə vey buzurquvar be.yəğbəlu məzirət....uzrxahəti kardə ikəsi uzri ğəbul kardedəbe.hiçvaxti bə bədi de bədi cəvob doydənıbe.bəlkəm,çı milləti yavə və bədə əməlonku de rohəti dəvardedəbe”.vəla yəczi ....çı cokəson cəfo iyən tındə hərəkəton mığobilədə de alicənobəti rəftor kardedəbe.yəsburu ...çı tındə hərəkəton mığobilədə nəyinki,deəy rəftor kardedənıbe və çəy əvəzi beşeydənıbe,bəlkəm əmr kardedəbe ki,qıləy çi bəy ətokon.