Հայկական կողմը տեղյակ է պահել. ԻԻՀ դեսպանը՝ սահմանազատման հանձնաժողովների հանդիպման մասին
Իրանի Իսլամական հանրապետությունում տեղյակ են եղել Հայաստանի ու Ադրբեջանի միջև տեղի ունեցած սահմանազատման հանձնաժողովի այսօրվա հանդիպման ու արձանագրության բովանդակության մասին։ Այս մասին այսօր լրագրողների հետ զրույցում հայտնեց Հայաստանում ԻԻՀ դեսպան Մեհդի Սոբհանին։
Ավելի վաղ տեղեկացրել էինք, որ այսօր տեղի է ունեցել սահմանազատման հարցերով հանձնաժողովների հերթական հանդիպումը, որի ժամանակ հանձնաժողովները պայմանավորվել են սահմանազատումը սկսել Տավուշի մարզից, նախնական համաձայնեցվել են Հայաստանի Բաղանիս, Ադրբեջանի Բաղանիս-Այրում, Հայաստանի Ոսկեպար, Ադրբեջանի Աշաղը Ասկիպարա, Հայաստանի Կիրանց, Ադրբեջանի Խեյրեմլի, Հայաստանի Բերքաբեր, Ադրբեջանի Կըզըլ Հաջիլի գյուղերի միջև սահմանային գծի հատվածներում սահմանի անցումը:
«Հայ պաշտոնյաները մեզ տեղյակ են պահել այսօր կայացած սահմանազատման հանձնաժողովների հանդիպման ու արձանագրության բովանդակության մասին։ Մեզ ասել են, որ համաձայնությունները ձեռք են բերվել Ալմա Աթայի հռչակագրի հիման վրա, այսինքն` միջազգային սահմանների հիման վրա»,– ասել է Սոբհանին։
Դեսպանը հավելել է` իրեն տեղեկացրել են, որ այն տարածքը, որտեղով անցնում է միջպետական մայրուղին, չի մտնում համաձայնագրի մեջ։
Հիշեցնենք` ապրիլի 17–ին ՀՀ վարչապետ Նիկոլ Փաշինյանն այցելել էր Տավուշի մարզ և հանդիպել Ոսկեպար, Կիրանց և Բերքաբեր գյուղերի բնակիչների հետ։ Դրանք այն համայնքներն են, որոնց հարակից տարածքները, ըստ Ալմա Աթայի հռչակագրի, պետք է հանձնվեն Ադրբեջանին։ Դրանց մոտով են անցնում Վրաստան տանող միջպետական ճանապարհը, Հայաստան մտնող գազամուղը։ Փաշինյանը Տավուշում էր նաև մարտի 18-ին, երբ հայտարարեց, որ Ադրբեջանի պահանջածը չտալու դեպքում պատերազմ կլինի։
Փաշինյանը Կիրանցում հայտարարել էր, որ վերջին 30 տարում մենք տարածաշրջանում ապրել ենք «բեսպրեդելի» պայմաններում, ու եկել է ժամանակն այն ավարտելու, օրենքի գերակայություն հաստատելու ոչ միայն մեր երկրում, այլև տարածաշրջանում։ Նա նաև նշել էր, որ արդեն հաջորդ շաբաթվանից համայնքների ներկայացուցիչները ներգրավված կլինեն սահմանազատման և սահմանագծման հանձնաժողովում։
