Հայաստանի եւ Ադրբեջանի նախագահները խոսում են քաղաքական լուծման մասին, բայց քայլեր չեն ձեռնարկում
Ղարաբաղյան հակամարտության կողմերն այժմ ավելի հեռու են համաձայնագրից, քան նախկինում: Այսպիսի կարծիք է հայտնել ԵԱՀԿ Մինսկի խմբի նախկին համանախագահ Քերի Կավանոն հոկտեմբերի 18-ին Հելսինկյան կոմիտեում տեղի ունեցած քննարկումների ժամանակ:
Նախկին համանախագահը նշել է, որ տարածաշրջան բերված զենքի տեսակները ավելի բարդ իրավիճակ են ստեղծում:
Նրա խոսքով՝ Հարավային Կովկասում իրավիճակը ուժեղ փոփոխություններ է կրում:
«Տարածաշրջանում տնտեսական ինտեգրում կա, դրամատիկ քաղաքական փոփոխություններ», - ավելացրել է նա:
Կավանոն ընդգծել է, որ Լեռնային Ղարաբաղը սառեցված հակամարտություն չէ. այն հալված եւ շատ վտանգավոր հակամարտություն է:
Խոսելով բանակցությունների պատմության մասին՝ դիվանագետը ավելացրել է, որ ժամանակ առ ժամանակ կողմերի միջեւ փոխզիջմանն ավելի մեծ պատրաստակամություն է եղել:
Հակամարտությունը դարձել է միջազգային, եւ այն ստանում է միջազգային հանրության զգալի ուշադրությունը, արձանագրել է նախկին համանախագահը:
«1987 թվականից ի վեր չի եղել Ամերիկայի Միացյալ Նահանգների նախագահ, որը չիմանար Լեռնային Ղարաբաղի հակամարտության մասին», - հավելել է Կավանոն:
Նա ասել է, որ կարեւոր է, որ կողմերը ընդլայնեն գործող նախագահ Անջեյ Կասպրշիկի անձնական ներկայացուցչի գրասենյակը եւ ստեղծեն միջադեպերի հետաքննման մեխանիզմ:
Նա հավելել է, որ նախագահները բազմիցս հայտարարել են, որ քաղաքական լուծում են ուզում, բայց նրանք այդ ուղղությամբ չեն գործում:
