Իրանի արտգործնախարար. Իրանցի գիտնականի սպանությունը վկայում է հուսահատ հանցագործների ռազմատենչության մասին
Նշելով, որ իրանցի մեծ գիտնականի սպանության մեջ Իսրայելի դերի լուրջ նշաններ կան, Իրանի արտգործնախարարը հայտարարել է. «Իրանցի գիտնականի սպանությունը վկայում է հուսահատ հանցագործների ռազմատենչության մասին»:
Մոհամմադ Ջավադ Զարիֆն իր թվիթերյան օգտահաշվում ֆրանսերենով արված գրառման մեջ նշել է, որ ահաբեկիչները սպանել են իրանցի մի մեծ գիտնականի: Նա գրել է. «Այս վախկոտ սպանությունը, որում կան Իսրայելի դերի մասին վկայող լուրջ նշաններ, վկայում է հուսահատ հանցագործների ռազմատենչության մասին»:
Զարիֆը նշել է. «Իրանը միջազգային հանրությանը, այդ թվում ՝ Եվրամիությանը, կոչ է անում հրաժարվել երկակի ստանդարտներից և դատապարտել այս պետական սպանությունը»:
Մինչ այժմ շատ երկրներ, այդ թվում՝ Ռուսաստանը, Վենեսուելան, Հարավային Աֆրիկան և Թուրքիան, դատապարտել են իրանցի միջուկային գիտնական Մոհսեն Ֆախրիզադեի սպանությունը:
Ըստ իրանցի պաշտոնյաների, կան ապացույցներ, որ Իսրայելն այս սպանությունն իրականացրել է ԱՄՆ-ի կանաչ ազդանշանով:
