Իրանի բանակի խոսնակ․ Իրաքյան Քուրդիստանի Էրբիլում ԱՄՆ-ի բոլոր ենթակառուցվածքները ոչնչացվել են

ԻԻՀ բանակի խոսնակը հայտարարել է, որ երկրի զինված ուժերը լուրջ վնասներ են հասցրել ԱՄՆ-ի ռազմաբազաներին, և դրանց զգալի մասը այլևս պիտանի չէ գործողությունների համար։

Pars Today-ի հաղորդմամբ՝ վկայակոչելով Mehr լրատվական գործակալությունը, բրիգադի գեներալ Մոհամմադ Աքրամի-Նիան շաբաթ երեկոյան Իրանի հեռուստատեսությամբ հեռարձակված հաղորդման ժամանակ ասել է. «Եթե այս պատերազմը շարունակվի, մենք պատրաստ ենք, ինչպես նախկինում, շարունակել մեր գործողությունները, մինչև ամերիկացիները հասկանան, որ ագրեսիայի միջոցով չեն կարող իրենց կամքը պարտադրել Իրանի ժողովրդին»։
Իրանի բանակի խոսնակը հավելել է. «40-օրյա պատերազմի ավարտին ներկայացրինք նոր անօդաչու թռչող սարքեր։ Անհրաժեշտության դեպքում հետագայում կհրապարակենք դրանց տեխնիկական բնութագրերը։ Այժմ օգտագործում ենք նաև «Արաշ-2»-ից ավելի առաջադեմ անօդաչու սարքեր, որոնք ունեն ավելի մեծ խոցման հզորություն, ավելի բարձր ճշգրտություն և ավելի մեծ հեռահարություն, սակայն մինչ այժմ դրանց բնութագրերը չենք հրապարակել»։
Բրիգադի գեներալ Աքրամի-Նիան նշել է. «Հրադադարի ընթացքում, ինչպես նաև պատերազմի ավարտից հետո, մեզ հաջողվել է վերականգնել այն բազմաթիվ սարքավորումները, որոնք թիրախավորվել էին, և դրանք կրկին վերադարձնել մարտական հերթապահության։ Սա իրականում իրականացվել է»։
Նա ասել է. «Նաև ներմուծել ենք մի շարք նոր սարքավորումներ, որոնք մեզ տվել են շատ կարևոր հնարավորություններ և Իրանի օդային տարածքը, 40-օրյա պատերազմի համեմատ, հարաբերականորեն ավելի անապահով են դարձրել հակառակորդի համար»։
Իրանի բանակի խոսնակն ընդգծել է. «Ոչ մի երկիր չի կարող պնդել, որ իր օդային տարածքը հարյուր տոկոսով անվտանգ է։ Նույնիսկ ԱՄՆ-ում ժամանակ առ ժամանակ անհայտ ինքնաթիռներ են ներթափանցում տարբեր ուղղություններից և նույնիսկ հասնում Սպիտակ տան տարածք»։