Թուրքիան դատապարտել է Հայոց ցեղասպանությունը ճանաչելու Նիդերլանդների խորհրդարանի որոշումը
Հինգշաբթի երեկոյան, հաղորդագրություն տարածելով, Թուրքիայի արտգործնախարարությունը դատապարտել է Հայոց ցեղասպանությունը ճանաչելու Նիդերլանդների խորհրդարանի ներկայացուցիչների պալատի որոշումները:
Նիդերլանդների խորհրդարանի ներկայացուցիչների պալատը հինգշաբթի օրը, Օսմանյան Թուրքիայում 1915 թվականի հայերի զանգվածային սպանդը ճանաչել է որպես ցեղասպանություն:
Նիդերլանդների խորհրդարանի ներկայացուցիչների պալատի անդամ Խադիջա Արիբան հայտարարել է, որ Ստորին պալատի պատգամավորները նախաձեռնությունն ընդունել են ձայների մեծամասնությամբ` 142 կողմ, 3 դեմ։
Նիդերլանդների խորհրդարանականները նաեւ որոշել են, որ կառավարության անդամը կմասնակցի ապրիլի 24-ին Երեւանում կայանալիք հիշատակի միջոցառումներին։
Ֆարս լրատվական գործակալության հաղորդման համաձայն, Թուրքիայի արտգործնախարարությունը տարածած հաղորդագրության մեջ անհիմն է համարել Նիդերլանդների խորհրդարանի որոշումը և հայտարարել, որ նման որոշումը տեղ չունի պատմության մեջ:
Թուրքիայի արտգործնախարարության հայտարարության մեջ ասված է, որ Նիդերլանդների խորհրդարանի կայացրած որոշումները իրավաբանական տեսանկյունից ոչ պարտադիր են, ոչ էլ վավեր: