ԱՄՆ-ում միգրանտ ընտանիքի անդամների առանձնացումն աշխարհում ամենակոպիտ ոճրագործություններից է. Միջազգային համաներում
Միջազգային համաներում կազմակերպության նոր տնօրենն ասել է. «Մեքսիկայի հետ ԱՄՆ-ի սահմանին միգրանտ երեխաներին իրենց ծնողներից առանձնացնելու Թրամփի կառավարության քայլը ամենակոպիտ ոճրագործություններից մեկն է, որի ականատեսն է եղել աշխարհը մինչ օրս:
Համաձայն «Ասոշիեյթեդ պրես»-ի հաղորդման, Միջազգային համաներում կազմակերպության նոր տնօրեն Քումի Նայդոն ընդգծել է. «Աշխարհի շատ ղեկավարներ, մասնավորապես ԱՄՆ նախագահ Դոնալդ Թրամփը խաթարում են մարդու իրավունքների հանդեպ հարգանքի ուղղությամբ նվաճումները»:
ԱՄՆ նախագահն անցած ամիսների ընթացքում գործադրելով «Զրո հանդուրժողականություն» խորագրով հակամիգրացիոն իր քաղաքականությունը, փաստաթղթեր չունեցող շուրջ 2000 միգրանտ երեխաների Մեքսիկայի սահմանին բաժանել է իրենց ընտանիքներից:
Նայդոն ԱՄՆ-ին, Սաուդյան Արաբիային, Հունգարիային ու Ֆիլիպիններին դասել է այն երկրների շարքը, որոնք պետությունները չեն հարգում մարդու իրավունքները:
Քումի Նայդոն ծնվել է Հարավաֆրիկյան Հանրապետությունում և հակաափարթայդ ակտիվիստ է եղել: Նա չորեքշաբթի օրվանից չորս տարվա ժամանակաշրջանի համար ստանձնեց Լոնդոնում հաստատված Միջազգային համաներում կազմակերպության նախագահությունը:
