ننګرهار کې به زمکني توتان د تاریاکو د فصل ځای ناستی شي
زمونږ خبریال وايي د افغانستان د ننګرهار د والي د ویندوې له دفتره رسنیو ته په استول شوې خبر پاڼه کې ویل شوي چې په ننګرهار کې سږ کال د زمکنیو توتانو(Strawberry) د حاصل کچه تر یوسلو اویا (۱۷۰)ټنو زیاته اټکل شویده .
په خبر پاڼه کې راغلي چې اوسمهال زمکني توتان د ننګرهار ولایت په خوږیاڼیو، سره رود، دره نور، کامې او ګوشتې ولسوالیو کې کرل کیږي .
د خبرپاڼې پر وینا د زمکنیو توتان حاصلات په کور دننه د پلور ښه بازار لري .
په خبر پاڼه کې راغلي چې د ننګرهار د کرهڼې او مالدارۍ ریاست هڅه کوي د هغه ولسوالیو کروندګر هم د زمکنیو توتانو کښت ته هڅوي چې اوسمهال پر خپلو زمکو کوکنار کري.
په ننګرهار کې زمکني توتان او کوکنار پر یو مهال حاصل ورکوي .
سره له دې چې دطالبانو د اسلامي امارت مشریو فرمان په صادرولو سره په افغانستان کې دهر ډول نشه یی توکیو کښت ، تولید، قاچاق او کارونه منع کړې د ننګرهار کروند د کرل شویو کوکنارو د حاصلاتو په راټولولو بوخت دي .
ویل کیږي وروسته له هغې چې دطالبانو مشر د نشه یی توکیو د منع کیدو فرمان ورکړی د تاریاکو بیه هم دپخوا په پرتله څو برابره لوړه شویده.
