جوزجان کښې یو روغتیايي کلینک جوړیږي
د افغانستان په جوزجان ولایت کې یو روغتیايي مرکز جوړېږي او په کندهار کې د دوو کلینکونو تعمیرات روان دي
دافغانستان په جوزجان ولایت کې د یو باب روغتیایي کلنیک له جوړیدو څخه خبریږو.
د دې ولایت د عامې روغتیا ریاست مشر قاري ذبیح الله حسیني وایي چې د دې ولایت د (قوشتېپې) ولسوالۍ په (ګردن) سیمه کې د یو روغتیايي کلینک د رغولو چارې پيل شوې.
دنوموړي په وینا د دې صحي مرکز جوړېدل کولای شي د (۱۰) زرو کورنو روغتیايي ستونزې حل کړي.
ویل کیږي د دې روغتیايي مرکز لپاره ځمکه دخلکو له لوري ورکړل شوې ده چې (۴) څلور میلیونه افغانۍ ارزښت لري.
بلخوا د کندهار د عامې روغتیا چارواکي وايي چې د دې ولایت په (پنجوايي) ولسوالۍ کې د دوو روغتیايي کلینیکونو دیوشمېر مهمو برخو د بیارغونې چارې تکمیل شوي او رسماً ګټې اخیستنې ته سپارل شوي دي.
د کندهار د عامې روغتیا د ریاست دچارواکو په وینا د دوو کلینیکونو د بیا رغولو چارې د (ډاکار) موسسې په مالي ملاتړ سرته رسیدلي دي.
دیادولو وړ ده چې تیره ورځ په جوزجان ولایت کې د درې لاکه او یو اویا زره (۳۷۱۰۰۰) زره افغانیو په ارزښت (۱۵۵) قلمه بې کیفیته او له تاریخ څخه تېرشوي درمل له منځه یوړل شول.
