د افغانستان خلک سخت ساړه سره مخ دي
زمونږ خبریال راپور راکړی په افغانستان کښې د ګازو د لیک کیدا او د سخت ساړه له کبله اوه کسان ووژل شول.
د بادغیس ولایت ځايي چارواکو نن وویل چې په دغه ولایت کښې د سخت ساړه له کبله د یوه څاروي ساتونکي او د څلورو ماشومانو په شمول پینځه کسان ووژل شول.
د افغانستان په ځینو شمالي ولایتونو کښې د تودوخي درجه څه د پاسه منفي دیرش سینټي ګراده ده.
په بادغیس کښې د طالبانو د حکومت د والي ویاند احمد جان خنظله وویل د ساړه له کبله د پینځو کسانو په مړکیدا سربیره د دغه ولایت د خلکو څه د پاسه زر(۱۰۰۰) څاروي هم د سخت ساړه له کبله مړه شول.
په جوزجان ولایت کښې هم د ګازو د لیک کیدا په وجه د یوه خصوصي بانک دوه ساتونکي ووژل شول.
له دې مخکې د افغانستان په لیرې پراتو او سړو سیمو کښې د سخت ساړه له کبله څو کسان مړه شوي وو.
افغانستان له تیرې پنجشنبې ورځې راهسې له سخت ساړه سره مخ دی چې د تیرو کلونو په نسبت ساری نلري.
