طالبان:
د رسنیو ازادی ته ژمن یو
د طالبانو د سرپرست حکومت د اطلاعات او فرهنګ د وزارت چارواکو په کابل کې د رسنیو د ازادی د نړیوالې ورځې په مراسمو کې اعلان وکړ چي د ملي او اسلامي چوکاټ کې د رسنیو ازادی ته ژمن دي.
تېره ورځ په کابل کې د خبریالانو د خوندیتوب د کمیټې له خوا د رسنیو د ازادی د نړیوالې ورځې په مناسبت یوه غونډه هم رابللې وه، چې د طالبانو د اطلاعتو او کلتور د مسوولینو په ګډون ګڼ شمېر خبریالانو هم په کښې برخه اخیستې وه.
په غونډه کې د طالبانو د حکومت د اطلاعاتو فرهنګ وزارت مرستیال مولوي عتیق الله عزيزي وویل، چې دوی د اسلامي ارزښتونو په رڼا کې د بیان او مطبوعاتو ازادۍ ته درناوی لري.
نوموړي وویل، د سرپرست حکومت لخوا په افغانستان کې د مطبوعاتو د آزادۍ پر وړاندې هېڅ ګواښ نه دی متوجه او رسنۍ او خبریالانو په خپلو چارو کې خپلواک دي.
عزیزي همدارنګه یادونه وکړه چي د رسنیو پورې د اړوندو ستونزو د هوارولو په لړ کې هلې ځلې روانې دي.
په افغانستان کې د ورځپاڼو د خبریالانو د اتحادیې مشر حجت اله مجددي هم په غونډه کې په ګډون سره، وویل: د طالبانو د سرپرست حکومت سره د همږغی په نتیجه کې معلوماتو ته د لاسرسی ستونزه هواره شوې ده.
