افغانستان د اضافي ځانګړي استازي ټاکلو ته اړتیا نه لري
د طالبانو د بهرنیو چارو وزارت سرپرست امیرخان متقي په کابل کې د چین له سفیر ژاو شینګ سره په لیدنه کې ویلي چې په افغانستان کې د اضافي ځانګړي استازي د ټاکلو اړتیا نه لیدل کېږي.
د طالبانو د بهرنیو چارو وزارت ویاند عبدالقهار بلخي په خپله ایکسپاڼه کې د متقي او شینګ ترمنځ د لیدنې خبر ورکړی دی.
نوموړي ویلي چې په دې ناسته کې د طالبانو او چین ترمنځ پر اړیکو، سیمهایزو مسایلو او له افغانستان سره د بېجینګ پر مرستو خبرې اترې شوې دي.
ورته مهال، بلخي کابل کې د چین د سفیر په حواله لیکلي چې نوموړي زیاته کړې چې بیجینګ به د خپل بهرني سیاست په رڼا کې له دوی سره اوږدمهاله ملګرتیا ته دوام ورکړي.
امیرخان متقي داسې مهال دا څرګندونې کړي چې څه موده وړاندې د ملګرو ملتونو امنیت شورا داسې پرېکړهلیک تصویب کړ، چې له مخې یې دا سازمان د افغانستان لپاره یو ځانګړی استازی ټاکي، څو له طالبانو سره د «تعامل» څرنګوالی په ګوته کړي.
طالبانو د افغانستان لپاره د ځانګړي استازي له ګومارلو سره مخالفت ښودلی او ویلي چې د اضافي استازو ګومارلو ته اړتیا نه شته.
