حقاني اروپایي اتحادیې ته:
د ستونزو د هوارولو لپاره افغانستان باید د نړیوالو ارګانونو غړي شي
په افغانستان کې د طالبانو د سرپرست حکومت د کورنیو چارو وزیر د اروپایي اتحادیې د سفارت له شارژدافیرې سره، په کتنه کې وویل چي د ستونزو د هوارېدو لپاره افغانستان باید د نړیوالو ټولنو غړیتوب تر لاسه کړي.
د طالبانو د حکومت د کورنیو چارو وزیر سراج الدین حقانی د اروپایي اتحادیې له شارژدافیري رافائلا یودیچه سره، په ملاقات کې وویل: د دې لپاره چي په افغانستان کې روانې ستونزې هوارې شي، باید اسلامي امارت ته په نړیوالو ارګانونو کې غړیتوب ورکول شي څو افغانان خپل رېښتني استازي ولري.
حقاني زیاته کړه: افغانستان له څو لسیزو ستونزو او بې ثباتیو څخه اوس په چټکی سره، د سیاسي او اقتصادي ثبات په لورې درومي او افغانان له مودو پس د فیزیکي او نفسیاتي امنیت احساس کوي.
د اروپایي اتحادیې شارژدافیرې هم د امنیت په لړ کې د طالبانو د حکومت هڅې وستایلې او له افغانانو سره، د اروپایي اتحادیې د مرستو د دوام په هکله ډآډ ورکړ.
په دې وروستیو کې سهیل شاهین په ملګرو ملتونو کې طالبانو ته د افغانستان د استازولۍ د څوکۍ د نه سپارلو پرېکړه غیر عادلانه بللې وه او ویلي وه چي مخکني حکومت ته د دې څوکي ورسپارل د ملګرو ملتونو اعتبار ته زیان رسوي.