د نجونو پرمخ دې ژر تر ژره ښوونځي او پوهنتونونه پرانېستل شي

د افغانستان پخواني ولسمشر حامد کرزي یو وار بیا له اسلامي امارت غوښتي چې د نجونو پرمخ د زده کړو دروازې پرانیزي

هغه د زده‌کړې نړیوالې ورځې په مناسبت ویلي چې د یو هېواد عزت او پرمختګ په ښوونې او روزنې پورې تړلی؛ نو په کار ده، چې ژر تر ژره د نجونو پرمخ ښوونځي او پوهنتونونه پرانیستل شي.

په همدې حال کې تېره ورځ د یوناما مشرې روزا اتونبایوا هم ویلي چې د نجونو پرمخ د زدکړو بندیز دوام د منلو وړ نه دی.

هغې  ویلي، دا د ټولو غوښتنه ده چې په افغانستان کې دې د نجونو پرمخ ښوونځي او پوهنتونونه پرانیستل شي.

په افغانستان کې د طالبانو حکومت وایي چي، د نجونو پر زدکړو لګیدلي بندیزونه دایمي نه دي او د یو مناسب چوکاټ له جوړېدو وروسته به ټولو ته د کار او زدکړو زمینه برابره شي.