د افغانستان د کډوالو د حقونو د سرغړونې دې مخنیوی وشي
زمونږ خبریال راپور راکړی د طالبانو د بهرنیو چارو وزیر امیرخان متقي په کابل کې له خپل پاکستاني سیال اسحاق دار سره په لیدنه کې د افغان کډوالو د جبري ستنولو، سیاست او سوداګرۍ په اړه خبرې کړې دي.
د طالبانو بهرنیو چارو وزارت پرون په یوې خبرپاڼې کې لیکلي چې متقي د پاکستان د بهرنیو چارو له وزیره غوښتي چې د کډوالو د حقونو له سرغړونې دې مخنیوی وکړي.
د خبرپاڼې له مخې، متقي له پاکستان سره په لوړه کچه د مثبتو تعاملاتو غوښتنه کړې ده.
ورته مهال، اسحاق دار ویلي چې له کډوالو سره ناسم چلند شوی نه دی او په خبره یې د پاکستان امنیتي ځواکونه د دا ډول چلند اجازه نه لري.
نوموړي زیاته کړې چې د کډوالو شتمنۍ د هغوی خپلې دي او نه دې مصادره کېږي.
د پاکستان د بهرنیو چارو وزیر د افغانستان خارجه وزیر امیرخان متقي ته پاکستان ته د سفر کولو بلنه ورکړې ده.
دواړو لوریو د کاسا ۱۰۰۰ او ټاپي اقتصادي پروژو په هکله هم خبرې کړې دي.
ورته مهال د پاکستان د بهرنیو چارو وزیر په ارګ کښې د طالبانو له رییس الوزرا ملا محمد حسن اخوند سره هم لیدلي او د امنیتي مسایلو په اړه یې ورسره خبرې کړې دي.
دا کابل ته د پاکستان د بهرنیو چارو وزیر لومړنی سفر دی.
