له طالب ډلې په افغانستان کښې د نېټو د نمائنده غوښتنه

په افغانستان کښې د نېټو استازي له طالب ډلې وغوښتل د اشرف غني له حکومت سره دې د صلحې خبرې اترې وکړي.

د تسنيم خبري اژانس د رپوټ له مخې په افغانستان کښې د نېټو استازي کورنيليوس ريمرمن وويل، طالب ډله پکار دي د کابل له حکومت سره خبرې اترې شروع کړي چې په دغه هېواد کښې جنګ ختم شي.

له بلې د طالب ډلې يو وياند ذبيح ا... مجاهد وويل د امريکې او نېټو چارواکو په افغانستان کښې له خپلې ماتې څخه د عامه ذهنونو د اړولو لپاره داسې څرګندونو ته مخه کړې ده.

ذبيح ا... مجاهد وويل، د افغانستان د جنګ د ختمېدو يوازېنۍ لار له افغانستانه د امريکې په مشرۍ د بهرنيو فوځيانو وتل دي.

د افغانستان خلق او اکثر حکومتي او سياسي او مذهبي مشران هم په افغانستان کښې د امريکې په مشرۍ د بهرنيو فوځيانو شتون د جنګ او ناامنۍ سبب بولي.