د افغانستان حکومت ۱۵۰ طالبان آزاد کړل
-
آرشیو
د افغانستان حکومت د دغه هیواد په جیلونو کښې زنداني ۱۵۰ تنه نور طالبان خوشې کړي دي.
د افغانستان د ملي امنیت د شورا ویاند جاوید فیصل پرون وویل چې حکومت دغه ۱۵۰ طالب زندانیان چې د دغې ډلې له نوملړه په بهرو ۵۰۰ زندانیانو کښې شامل دي، د پروان او نورو ولایتونو له زندانونو خوشې کړې دي.
د ویلو ده چې د افغانستان ولسمشر محمد اشرف غني د جمعې په ورځ د لوې اختر په مناسبت د طالبانو له خوا د زنداني افغان امنیتي ځواکونو د آزادۍ په بدل کښې د دغې ډلې د ۵۰۰ نورو قیدیانو د خوشې کولو حکم صادر کړی و.
هغه وویل چې دغه زندانیان په لوې اختر کښې د اوربند د اعلان په هکله د طالبانو د پریکړې د هرکلي او د صلحې د بهیر د ګړندي کیدو په موخه آزادیږي او د دغې ډلې په پنځه زره کسیز لیسټ کښې نه دي شامل.
له بلې خوا په قطر کښې د طالبانو د سیاسي دفتر ویاند سهیل شاهین هم وویل چې دغې ډلې د افغانستان له امنیتي او دفاعي ځواکونو څخه د ۸۲ نورو بندیانو په آزادولو سره د افغانستان د حکومت د ۱۰۰۰ تنو زندانیانو د آزادۍ بهیر بشپړ کړی دی او کابل ته هم پکار دي چې پاتې طالب قیدیان خوشې کړي.
