اسلامي ایران د صهیونیسټ رژيم له جنایتونو سره د مقابلې غوښتنه وکړه
ایرنا خبري اژانس راپور راکړی د ایران د اسلامي جمهوریت د بهرنیو چارو وزیر سید عباس عراقچي په فلسطین او لبنان کښې د صهیونیسټ رژيم د جنایتونو په وړاندې د اسلامي هیوادونو په مسوولیت باندې ټینګار وکړ.
هغه په نیویارک کښې د ملګروملتونو د عمومي اسمبلۍ د نهه اویایمې غونډې په څنګ کښې د اسلامي ملګرتیاو د موسسې له مشر حسین ابراهیم طه سره په کتنه کښې د لبنان د حزب الله د مشر سید حسن نصر الله په ناځوانمردانه ټرور کښې د صهیونیسټ رژیم جنایت ته په اشارې سره له اسرائیلو رژیم سره د مقابلې لپاره د اسلامي هیوادونو په تیره بیا د اسلامي ملګرتیا موسسې په مسوولیت ټینګار وکړ او د اسلامي ملګرتیا موسسې د مشرانو د بیړنۍ غونډې د سمدستي ترسره کیدا غوښتنه یې وکړه.
د ایران خارجه وزیر عباس عراقچي ټینګار وکړ : دا لومړی ځل نه دی چې د مقاومت جبهه خپل یو عزتمن مشر له لاسه ورکوي او زه ډاډمن یم چې د مقاومت لاره به لا محکمه او په لا صلابت سره دوام ولري.
هغه دغه راز د ملګروملتونو امنیت شورا د صهیونیسټ رژیم د جنایتونو د بندولو او ورسره د مقابلې لپاره د ضروري ارادې نه لرونکي وبلله او جوته یې کړه: امریکا په فلسطین او لبنان کښې د اسرائیلو د نسل وژونکي رژیم په جنګي جنایتونو کښې شریکه ده.
د اسلامي ملګرتیا موسسې مشر حسین ابراهیم طه هم په دغه کتنه کښې په سیمه کښې د اسرائیلو رژيم د جنایتونو او د تیریو دوام وغاند او ویې ویل چې د غړیو هیوادونو له مشرانو سره د بیړنۍ غونډې د ترسره کولو په هکله به سمدستي مشورې وکړي او یو ضروري اقدام به ترسره کړي.
