صهیونیسټي رژیم په غزه کې ۴۸ نور فلسطینیان په شهادت ورسول
فلسطیني سرچینو د غزې په شمال او د کمال عدوان روغتون په مرکز او شاوخوا کې د النصیرت پر کمپ د اسرائیلي پوځیانو د بمباریو له امله، د ۴۸ فلسطینیانو د شهادت خبر ورکړ.
د سحاب شبکې د خبر له مخې، د وفا خبري آژانس د غزې په مرکز او د النصیرت کمپ په لوېدیځ کې پر یوه کور د اسرائیلو د هوايي برید په اړه راپور ورکړی او زیاته کړې چې په دې برید کې اته فلسطینیان شهیدان او یو شمېر نور ټپیان شوي دي.
په همدې حال کې ځینو سرچینو د دغه برید د شهیدانو شمېر تر ۱۸ تنو پورې ښودلی دی.
د وفا خبري آژانس په دوام کې ویلي: د صهیونیسټی رژیم جنګي الوتکو د غزې په شمال کې د کمال عدوان روغتون ته څېرمه یوکور هم بمبار کړ چې له امله یې ۳۰ فلسطینیان شهیدان او زخمیان شول او د یو زیات شمیر جسدونه اوس هم تر خاورو لاندې پاتې دي.
د فلسطیني رسنیو د راپورونو له مخې، د ۲۰۲۳ کال د اکتوبر له ۷مې پر غزې د صهیونیسټي رژیم د یرغل له پیل راهیسې، ۴۴ زره ۷۵۸ کسان وژل شهیدان او ۱۰۶ زره او ۱۸۸ نور هم ټپیان شوي دي.
