پرون نږدې ۳۰۰۰ کډوالې کورنۍ افغانستان ته ورستنې شوې
زمونږ خبریال راپور راکړی د طالبانو تر کنټرول لاندې رسنیو راپور ورکړی چې پرون دوه زره او ۹۶۳ افغانې کورنۍ هېواد ته ورستنې شوې دي.
د طالبانو تر کنټرول لاندې باختر خبري اژانس نن راپور ورکړ چې ۳۳ کورنۍ د نیمروز د ورېښمو پله له لارې، ۷۱ کورنۍ د هرات د اسلام کلا له لارې، ۱۰۰۴ کورنۍ د کندهار د سپین بولدک له لارې، ۱۷۰۰ کورنۍ د ننګرهار د تورخم له لارې، او ۱۵۵ کورنۍ د هلمند د بهرامچې له لارې هېواد ته ورستنې شوې دي.
له ایران او پاکستانه د افغان کډوالو وتل دوام لري او په دې وروستیو کې زیات شوي دي.
د ایران د کورنیو چارو وزارت د بهرنیو اوګړو او کډوالو چارو د مرکز مشر «نادر یار احمدي» په دې وروستیو کې اعلان وکړ چې د ایران د پلان له مخې به د شپږو میلیونو افغان کډوالو له ډلې یوازې ۵۰ سلنه کسانو ته په دغه هېواد کې د اوسیدو اجازه ورکړل شي.
بلخوا، د پاکستان د دفاع وزیر خواجه اصف هم ویلي وو چې په میلیونونو افغان کډوال باید خپل هېواد ته ستانه شي او پاکستان نور د میلمه پالنې لوړه بیه نشي زغملای.
