امریکا او ملګري یې د سیمې د بې ثباتۍ اساس دي
ایرنا خبري اژانس وايي د افغانستان په چارو کښې د ایران د اسلامي جمهوریت د ولسمشر ځانګړي استازي حسن کاظمي قمي امریکا او د هغه ځینې ملګري حکومتونه په سیمه کښې د بې ثباتۍ اساس وبلل.
د افغانستان په چارو کښې د ایران د ولسمشر ځانګړي استازي حسن کاظمي قمي چې د پاکستان له چارواکو سره د سلامشورې لپاره اسلام اباد ته تللی دی پرون په ټویټر پیغام کښې وویل پاکستان ته په سفر او د دغه هیواد له چارواکو سره په کتنه کښې ټینګار وشو چې په افغانستان کښې امنیت او ثبات د سیمې په هیوادونو کښې د ثبات په معنا دی.
کاظمي قمي زیاته کړه امریکا او د هغه ځینې ملګري حکومتونه په سیمه کښې د بې ثباتۍ عاملان دي.
په افغانستان کښې د امریکا شل کلن پوځي شتون په سیمه کښې له بې ثباتۍ، ناامنۍ او د نشه ییزو موادو د کر او د تولید له زیاتیدا پرته بل هیڅه نتیجه نه ده لرلي.
له افغانستان څخه د امریکا د عسکرو له تښتیدا وروسته معلومه شوه چې په دغه هیواد کښې د نشه ییزو موادو تولید د ۲۰۰۱ میلادي کال په پرتله څلویښت فیصده زیات شوی دی.
