ایران په مسکو کې ترهګریز برید وغنده

د ایران اسلامي جمهوریت د بهرنیو چارو وزیر په مسکو کې ترهګریزې پېښې ته په اشارې ویلي، له ترهګرۍ سره اغیزمنه مبارزه د نړیوالې ټولنې جدي اقدام ته اړتیا لري.

د بهرنیو چارو وزیر امیر عبدالهیان په خپل ایکس پاڼه لیکلي: زه په مسکو کې وروستی ترهګریز عمل په کلکه غندم، د قربانیانو له کورنیو سره د خواخوږۍ مراتب وړاندې کوم، د دغې غمجنې پېښې له امله خپل همکار سرګي لاوروف، د روسیې حکومت او خلکو ته د تسلیت مراتب وړاندې کوم.

هغه زیاته کړې، له ترهګرۍ سره ګډه او اغېزمنه مبارزه د نړیوالې ټولنې جدي او بې توپیره اقدام ته اړتیا لري.

تیره شپه مسکو کې د یوه کنسرت تالار ته د داخل شویو وسله والو په بریدونو کې څلوېښت تنه وژل شوي وو او تر سلو زیات ټپیان دي.