د ایران جګړه د امریکا تګلاره ننګوي

د «بلومبرګ» د راپور له مخې، د ایران جګړې د فارس خلیج د امنیت پر هغه جوړښت پوښتنې راپورته کړې چې له څو لسیزو راهیسې یې د امریکا پوځي حضور د سیمه‌ییز امنیت د مهم تضمین په توګه ګڼلی و.

د راپور له مخې، د سیمې هېوادونه اوس د دې په اړه پوښتنې لري چې واشنګټن به په کومو مواردو کې د هغوی د امنیت لپاره اقدام وکړي او په کومو مواردو کې به له مستقیمې مداخلې ډډه وکړي.

د امریکا د پوځي حضور د راتلونکي په اړه دا بحث د جګړې له پراخېدو سره لا مهم شوی دی.

په همدې تړاو، د «اتلانتیک شورا» یوه وروستۍ څېړنه هم وايي چې د ایران جګړې د امریکا د خلیجي امنیتي تضمینونو پخواني بنسټونه تر پوښتنې لاندې راوستي او د سیمې هېوادونه د خپلو امنیتي تګلارو د بیا ارزونې په حال کې دي.