روسیه له ایران سره د اړیکو د غوڅولو غوښتنه نه مني
زمونږ خبریال وايي د روسیې د باندنیو چارو وزیر سرګي لاوروف وویل ماسکو له ایران سره د ملګرتیا د غوڅولو لپاره د امریکا غوښتنه نه مني .
هغه پرون په ماسکو کښې د ایران د بهرنیو چارو له وزیر محمد جواد ظریف سره له کتنې وروسته د خبریالانو په شتون سره په ګډ خبري کانفرنس کښې وویل ماسکو او تهران نیت لري د امریکا له بایکاټونو سره سره د دواړو هیوادونو ترمینځ تجارتي ملګرتیاوې زیاتې کړي .
د روسیې خارجه وزیر سرګي لاوروف ډاګینه کړه د ایران پرضد د ملګروملتونو د امنیت شورا د بایکاټونو د احیا لپاره د امریکا هڅې هیڅ ملاتړ نلري .
هغه وویل ایران او روسیه د تهران پرضد د وسلو د نامحدودو بایکاټونو د لګولو لپاره د امریکا هڅې په پریکنده توګه ردوي .
سرګي لاوروف ټینګار وکړ روسیه له ایران سره د پانګونې او د تجارتي اړیکو د پراخولو غوښتونکی دی .
د ایران خارجه وزیر محمد جواد ظریف هم د ملګروملتونو په امنیت شورا کښې د امریکا ماتي ته په اشارې سره وویل د تهران پرضد د پخوانیو پریکړه لیکونو د بیرته ستنیدا په هکله د امریکا غوښتنه د نړیوالې ټولنې له مخالفت سره مخ شوي ده او دا د امریکا لپاره ترټولو ستره ماتي ده .
هغه هیله وکړه د روان میلادي کال په اکتوبر میاشت کښې چې روسیه د امنیت شورا مشرۍ پرغاړه اخلي د امریکا د قانون پرخلاف له کارونو سره مقابله وکړي او د امنیت شورا اعتبار وساتل شي .
د ایران او د روسیې خارجه وزیرانو د اټومي پروګام په هکله د مسائیلو د حل په لړ کښې د اټومي تړون د وروستي حالت په هکله د نظر تبادله وکړه .
امریکا د نړیوالې ټولنې له ارادې سره سره هڅه کوي د واشنګټن په ارادې او ګروهنې سره د ایران پرضد د ملګروملتونو د امنیت شورا بایکاټونه له سره اعمال کړي .
