د پاکستان کرکټ ملي لوبډلې خپله لومړۍ بریا ترلاسه کړه
پاکستان د کرېکټ په نړیوال جام کې د سه شنبې په ورځ د جون په یوولسمه له پرلپسې دوو ماتو وروسته خپله لومړۍ بریا تجربه کړه.
دا لوبه چې د کاناډا پر وړاندې ترسره شوه؛ د پاکستان په بریا سره پای ته ورسېده.
د کاناډا لوبډلې وکولای شول چې په شلو آورونو کې یوازې یوسلو اووه منډې وکړي، خو پاکستان دغه هدف په آته لسم آور کې د درېیو لوبغاړو په سوځېدو سره بشپړ کړ.
پاکستان د نړیوال جام په لومړیو دوو لوبو کې د امریکا او هند پروړاندې ماتې وخوړه. اوس به دا لوبډله په خپل ګروپ کې خپله بله لوبه د آیرلنډ پر وړاندې ترسره کوي.
د يادونې وړ ده، چې د کرکټ نړیوال جام په شل آوریزو سیالیو کې افغانستان، چې خپلې لومړۍ دواړه لوبې ګټلې دي، خپله درېيمه لوبه به د جمعې په ورځ له پاپواګيني سره ترسره کړي.
که افغانستان د دې لوبډلې پروړاندې بریا ترلاسه کړي، نو د دې دورې د اتو غوره لوبډلو ته به لار ومومي.
افغانستان اوس د جدول په سر کې ځای لري.
