د ایټالیا حکومت چرګ جرمانه کړی دی
زمونږ خبریال وايي په ټوله دنیا کښې د بیلابیلو هیوادونو او د سیمو خلک د چرګ د اذان کولو یا بانګ وهلو له فطرت څخه په ښه ډول خبر دي او عموما ځینې خلک بیا د چرګ په غږ سره خپل سهار پیلوي خو ځینې کسانو ته بیا د چرګ غږ ښه نه لګي او هغه په خپل خوب کښې خنډ ګڼي او له چرګ څخه بیزاره دي .
همدغه شان یوه (۱) پیښه د ایټالیا په کاسټیراګا ویډراډو سیمه ښارګي کښې رامینځته شوه چیرې چې درې اتیا (۸۳) کلن سړی انجلیو بولیټي د سهار په وخت د چرګ د غږ کولو په وجه یوسل شپږ شپیته (۱۶۶) یورو جرمانه شو .
د ایټالیا دغه درې اتیا (۸۳) کلن ښاریز انجلیو بولیټي وویل چې د کارلینو په نوم یو(۱) چرګ زما په باغ کښې له تیرو لسو (۱۰) کلونو راهسې وسید .
د ایټالیا دغه ښاریز بالاخره د ګاونډیاتو لخوا له شکایت وروسته دغه چرګ خپل یوه(۱) دوست ته ورکړ .
خو کله چې د انجلیو بولیټي دوست په لس (۱۰) ورځې رخصتۍ تللی و نو دوست ورته چرګ بیرته ورکړ خو د ګاونډیو لخوا پولیسو ته له شکایت کولو وروسته پولیسو د انجلیو بولیټي په کور چاپه ووهله او هغه یې د چرګ د بانګ وهلو په خاطر ۱۶۶ یورو جرمانه کړ .
د ویلو ده چې دا لومړۍ پیښه نه ده چې د چرګ له بانګو په تنګیدا سره خلک پولیسو ته شکایت کوي بلکې له دې مخکې هم په فرانسې کښې یوه(۱) سړي او ښځې د سهار په وخت د چرګ د بانګ وهلو پرضد پولیسو ته شکایت کړی و خو د محکمې او د وکیلانو ترمینځ له څو ورځې بحثونو وروسته عدالت د انسانانو پرځاې د چرګ په حق کښې فیصله کړي وه .
