له فلسطین څخه د مشروع دفاع په دوام د یمن ټینګار
د یمن د وسله والو ځواکونو ویاند یو ځلې بیا ټینګار وکړ تر هغه پورې چي صهیونیست رژیم په غزې باندې ظالمانه بریدونه بند نه کړي، یمن به د اسرائیل د رژیم پورې اړوندې کښتۍ په نښه کړي.
د یمن د وسله والو ځواکونو ویاند یحیی سریع په یوه خبري غونډه کې وویل: د یمن وسله والو ځواکونو د زوګرافیا کښتۍ چي د اسرائیل د رژیم د بندرونو په لوري روانه وه، په توغندیو سره په نښه کړه.
هغه زیاته کړه: زوګرافیا کښتۍ مو له هغه وروسته، په توغندیو سره په نښه کړه چي د یمن د وسله والو ځواکونو خبرداریو ته پاملرنه نه وکړه.
د یمن د وسله والو ځواکونو ویاند وویل: زمونږ اقدامات د فلسطین له ولس څخه د مشروع دفاع د حق په چوکاټ کې تر سره کیږي.
یحیی سریع جوته کړه: تر هغه پورې چي اسرائیل رژیم د غزې په خلګو بریدونه بند نه کړي، په سور سمندر او باب المندب کې به د صهیونیست رژیم د کښتیو په تګ راتګ باندې بندیز دوام ولري.
یاده کښتۍ له ویټنام څخه د اسرائیل د رژیم د بندرونو په لورې روانه وه چي د یمن د وسله والو ځواکونو له توغندوي برید سره مخ شوه.