حزب الله تل ابیب په نښه کړ؛ یو میلیون صهیونیسټان په پټنځایونو کې پټ شول
پارس ټوډې - د صهیونیسټي پوځ راډیو، د لبنان د حزب الله لخوا پر تل ابیب باندې د لومړي راکټي برید خبر ورکړ.
د الجزیرې د راپور په اساس، د صهیونیسټي پوځي راډیو پرون چهارشنبه اعلان وکړ: د لبنان د حزب الله لومړی توغندی د نننۍ جګړې په ترڅ کې د تل ابیب په لور وتوغنول شو.
د صهیونیسټي پوځ راډیو همدارنګه، د تل ابیب په لور د لبنان د حزب الله د بالیسټیک توغندیو د شنډولو لپاره، د فلاخن داوود توغندوي سیسټم د فعالېدو خبر ورکړ.
د دغه راپور له مخې، د لبنان حزب الله پر تل ابیب د پرون ورځې په حملې سره، د لومړي ځل لپاره د صهیونیسټي اهدافو په خلاف د اوږده واټن ویشتونکی توغندی استعمال کړ.
المیادین خبري سایټ هم د لبنان په سویل کې د خپل خبریال په حواله په یوه راپور کې ویلي چې د قادر ۱ توغندی د اوږد واټن ویشتونکی توغندی دی، چې په دغه جنګ کې د لومړي ځل لپاره کارول شوی دی.
عبري رسنیو هم راپور ورکړی چې د خطر زنګ په غږولو سره یو میلیون صهیونیسټان په څو دقیقو کې په تل ابیب کې پناه ځایونو ته ننوتل.
د عبري ژبې رسنیو همدارنګه، د تل ابیب په شمال کې په نتانیا، شارون او عیمق حیفر کې د خطر زنګونو د غږول کېدو خبر ورکړی دی.
عبري رسنیو منلې چې د لبنان حزب الله یوازې په یوه ورځ کې د صهیونیسټي رژیم پر مرکزونو څه دپاسه څلور سوه توغندي ویشتلي دي.
د دغو رسنیو د راپورونو له مخې، یاد شوی شمېر په تېر کال کې له صهیونیسټي دښمن سره د جګړې له پیل راهیسې د حزب الله له خوا د توغول شویو توغندیو تر ټولو لوړ شمېر دی.
کلیدي کلمې: صهیونیسټي رژیم، د لبنان حزب الله، میزایل، تل ابیب، بالسټیک.
