حماس: نتانیاهو په قصدي توګه په خبرو اترو کې خنډونه جوړوي 

پارس ټوډی - د حماس جنبش یو لوړپوړي غړي وویل چې دا جنبش چمتو دی ترڅو هراړخیز تړون لاسلیک کړي  او د فلسطیني او صهیونیسټي بندیانو د خلاصون لامل شي، خو د اشغالګر رژیم لومړی وزیر په قصدي توګه د خبرو اترو په بهیر کې خنډونه رامنځته کوي. 

محمود مرداوي اعلان وکړ چې حماس د مصر او قطر د منځګړو له خوا د وړاندې شویو وړاندیزونو سره، چې د امریکا ملاتړ ورسره و، پرته له کوم شرط موافقه کړې ده، خو نتانیاهو د خپل مذاکراتي پلاوي له استولو ډډه کړې او د وخت ضایع کولو او بهانو په سیاست روان دی. 

نوموړي ټینګار وکړ چې حماس د هغه هر پلان سره مخالفت نه کوي چې د جګړې د درولو، د دواړو خواوو د بندیانو د خلاصون، بشري مرستو ته د لاسرسي او د فلسطیني لیدلوري پر بنسټ د بیارغونې لامل شي.