په قاهره کې فلسطیني مشران: صهیونیسټي نیواکګر باید له غزې ووځي
پارس ټوډې- د فلسطیني مبارزو ډلو مشران له غزې څخه د صهیونیسټي رژیم د نیواکګرو عسکرو د وتلو، د اوربند د بشپړ اجرا کولو او د غزې د بیا رغونې پر پیل ټینګار کړی دی.
د پارسټوډې د راپور له مخې، د فلسطین مقاومتي ډلو مشران تېره جمعه په قاهره کې د دوو ورځو غونډې په پای کې چې د مصر د حکومت په رسمي بلنې سره او د دغه هېواد د ولسمشر «عبدالفتاح السیسي» په ملاتړ کې ترسره شوه، د اوربند د موافقې د بشپړ اجرا کولو، د اسرائیلي رژیم د نیواکګرو عسکرو له غزې څخه په وتلو، د کلابندۍ په ختمولو او د دغې سیمې د بیا جوړولو د پیلولو غوښته کړې ده.
په دغې غونډې کې د غزې د اوربند لپاره د امریکاد ولسمشر «ډونالډ ټرمپ» د دویمې مرحلې پلان وڅېړل شو او د فلسطین ملي پروژې د ساتنې او د ملي یووالي د بیرته احیاء کولو په موخې سره د جامعو ملي خبرو اترو د ترسره کولو مقدمات برابر شول.
فلسطیني ډلو مشرانو همدارنګه د غزې، لوېدیځي غاړې او د قدس له نیواکي ټاټوبو سره د هر ډول الحاق یا اجباري کډوالۍ پلانونه په سخته وغندل.
د غزې اوربند ته د فلسطین د مقاومتي ډلو د ژمنې شرط، موافقې ته د وحشي صهیونیسټي رژیم ژمنتیا ده.
په عین حال کې د فلسطین جهاد اسلامي عمومي منشي، زیاد النخاله، په ټینګار سره وویل چې په غزې کې د اوربند موافقې د پیاوړي کېدو شرط د فلسطیني مبارزو ډلو او اسرائیلي رژيم دواړو خوا د دغې موافقې توافق د مادو د اجرا کولو ژمنې دي، تر هغه چې اسرائیلي رژیم اوربند ته ژمن وي، فلسطینیان به هم ورته ژمن پاتې شي.
د حماس غورځنګ ویاند: موږ اوربند ته ژمن یو
همدارنګه په غزه کې، د فلسطین د اسلامي مقاومتي غورځنګ (حماس) ویاند حازم قاسم،په یولړ څرګندونو کې وویل چې دا غورځنګ د منځګړو د هڅو په پایله کې ترلاسه شوي اوربند د موافقې تفصیلاتو ته پر خپلې ژمنې ټینګارکوي.
حازم قاسم له الجزیرې سره په مرکه کې د دې خبرې په څرګندولو سره چې موږ له صهیونیسټي نیواکګرو څخه غواړو چې د خپلو ژمنو په تیره بیا د هوايي یرغلونو د بندولو، د کلابندۍ د ختمولو او د نړیوالو مرستو د واریدیدا چارې دې عملي کړي، زیاته یې کړه: حماس له جګړې وروسته په غزه کې د حکومت د جوړښت په اړه د فلسطین د ملي موافقې د ترلاسه کولو په تمه دی چې ټولې پاتې مسلې حل کړي.
صهیونیسټي رژیم باید د غزې د بیا جوړولو لګښت ورکړي
د فلسطین اسلامي مقاومت غورځنګ (حماس) د سیاسي دفتر غړي، «موسی ابومرزوق»، هم پخپلوڅرګندونو کې ټینګار وکړ چې صهیونیسټي نیواکګر رژيم د غزې د تباهۍ مسؤل دی او باید د دغې سیمې د بیا جوړولو لګښتونه ورکړي.
ابومرزوق له سپوټنیک خبري اژانس سره په خبرو کې وویل: د غزې د تباهۍ بیا جوړول فرض او له دوو میلیونو څخه زیاتو فلسطینيو وګړو حق دی چې خپل کورونه، سرپناه او د عایداتو سرچینې یې له لاسه ورکړې دي او اوس باید د هغوی ځایونه جوړ شي او لګښت یې هم ورکړل شي.
هغه زیاته کړه: د امنیت شورا پرېکړهلیک د غزې په بیا جوړولو ټینګار لري، ځکه چې نیواکګر د دغې سیمې د تخریب او تباهۍ مسؤل دي، باید د هغې د بیا جوړولو لګښتونه په بشپړ ډول ورکړي.
د یمن انصارالله: موږ د غزې اوربند ته د اسرائیلو ژمنې څارو
په عین حال کې د یمن عالي سیاسي شورا غړي، محمدعلي الحوثي، په څرګندونو کې وویل چې یمن تل د غزې اوربند په باب د صهیونیسټي رژیم ژمنې څاري. محمدعلي الحوثي ټینګار وکړ چې یمني ځواکونه د هر ډول سرو کرښو د ماتولو او د اسرائیلي دښمن احمقانه اقداماتوته د ځواب ورکولو لپاره په لوړې کچې چمتووالی لري.
د یمن انصارالله غورځنګ د سیاسي دفتر غړي «محمد البخیتي»، هم له دې مخکې په څرګندونو کې ټینګار کړی وو چې موږ په هر حالت او شرائطو کې د غزې د مظلومو خلکو تر څنګ درېږو.
