سعودي عربستان په یمن بمباریو ته دوام ورکړی
زمونږ خبریال وايي د سعودي عربستان د تیریګر ائتلاف جنګي الوتکو په یمن باندې د هوايي حملو په دوام کښې په تیرو څلرویشتو (۲۴) ساعتونو کښې د دغه هیواد په بیلابیلو ولایتونو باندې څلورڅلویښت (۴۴) ځله بمبارې وکړې .
دغه بریدونه د یمن په مرکز کښې په صنعا ، مارب ، البیضا او په لویدیځ کښې په الجوف او صعده ولایتونو شوي دي .
سعودي عربستان پرون د یمن د پلازمینې صنعا په جنوب کښې په النهدین سیمې دوه (۲) ځله بمبارې وکړې .
دغه راز د یمن د انصار الله غورځنګ ویاند محمد عبدالسلام د سعودي عربستان د ائتلاف د حملو او د جنایتونو په وړاندې د عربي نړۍ او د نړیوالې ټولنې په چپتیا نیوکه وکړه .
هغه د یمن په وړاندې د ملګروملتونو په دوه ګوڼوالي او د سعودي عربستان د ائتلاف د اقداماتو په مقابل کښې د دغه ادارې په سیاستونو نیوکه وکړه او ویې ویل هغه وخت چې د یمن ملت حملو ته په ځواب کښې په خپل حق عمل کوي نو ملګري ملتونه او نور هیوادونه قلم په لاس کښې اخلي او د غندنې بیانیې خپروي .
