Amnesty International: Israel inaendelea kufanya mauaji ya kimbari Ghaza

Shirika la kimataifa la kutetea haki za binadamu la Amnesty International limetangaza kuwa, utawala wa kizayuni wa Israel "unaendelea bila kusita kufanya mauaji ya kimbari dhidi ya Wapalestina huko Ghaza, licha ya usitishaji mapigano" ulioanza kutekelezwa tarehe 10 Oktoba.

Utawala wa kizayuni wa Israel umekuwa ukikana mara kwa mara shutuma hizo, ukiziita "za uwongo," "za chuki dhidi ya Wayahudi," au "za kubuniwa kabisa," iwe zinatoka kwa Amnesty International, mashirika mengine ya kutetea haki za binadamu, wataalamu wa Umoja wa Mataifa, au hata nchi kama Afrika Kusini, ambayo imefungua kesi dhidi ya utawala huo ghasibu katika Mahakama ya Kimataifa ya Haki ICJ.

Baada ya kupita zaidi ya miaka miwili ya vita kinyama na mauaji ya kimbari yaliyoanzishwa na utawala wa kizayuni dhidi ya Ukanda wa Ghaza, makubaliano ya usitishaji mapigano kati ya jeshi la utawala huo na harakati ya ukombozi wa Palestina ya Hamas yalianza kutekelezwa kwa mashinikizo ya Marekani.

Amnesty International imetoa ripoti iliyotokana na ushuhuda mwingi wa wakazi wa Ghaza na tafiti kadhaa za kimataifa, ikiwa ni pamoja na ripoti za Umoja wa Mataifa.

Ripoti hiyo imefikia hitimisho kwamba "Israel inaendelea kuzuia vikali uingizaji wa vifaa na urejeshaji wa huduma muhimu kwa ajili ya maisha ya raia Wapalestina katika Ukanda wa Ghaza."

Hayo yanaripotiwa katika hali ambayo, utawala wa kizayuni umeshawaua shahidi Wapalestina wapatao 70,000, wengi wao wakiwa wanawake na watoto, na kuwajeruhi zaidi ya 170,000 katika vita ulivyoanzisha Oktoba 2023 dhidi ya Ghaza…/