Ahlan wasahlan wamarhaba ashiki na mfuatiliaji wa matukio ya spoti. Karibu tutupie jicho baadhi ya matukio muhimu ya michezo yaliyoshuhudiwa ndani ya siku saba zilizopita katika pembe mbalimbali za dunia.

Ligi Kuu ya Soka ya Iran

Klabu ya Persepolis ilipata ushindi hafifu wa bao 1-0 siku ya Alkhamisi ilipovaana na Teraktor Sazi katika mchuano wa wiki ya 14 ya Ligi Kuu ya Soka ya Iran. Bao la dakika ya 53 la Seyed Jalal Hosseini lilitosha kuwakata ng'ebe watengeneza matrekta wa Iran.

Wachezaji wa Persepolis walinyamaza kimya kwa dakika moja kabla ya kuanza mchuano huo, kama ishara ya heshima na kumuenzi mchezaji wa zamani wa klabu hiyo ya Wekundu wa Tehran, Ali Ansarian, aliyeaga dunia Jumatano kutokana na ugonjwa wa Covid-19. Mahasimu wao Esteqlal siku ya Ijumaa, walijikuta wakibanwa na klabu chovu ya Nassaji, na mchuano huo kuishia kwa The Blues wa Tehran kupata ushindi mwembamba wa goli 1 bila jibu. Bao la Esteqlal lilitiwa kimyani na Farshid Baqeri kunako dakika ya 86.

Esteqlal inasalia kileleni kwa jedwali la Ligi Kuu ya Soka ya Iran kwa alama 26, ikifuatiwa na Sepahan yenye alama 25. Sepahan alijiongezea pointi tatu muhimu siku ya Ijumaa baada ya kuibamiza Zob Ahan mabao 3-1 katika Uwanja wa Fooladshahr mjini Isfahan. Sanat Naft na Foolad waliondoka uwanjani kwa alama moja kila mmoja baada ya mchuano wao wa Debi la Abadan kumalizika kwa sareya bao 1-1. Sanat Naft walitangulia kuona nyavu za mahasimu wao Foolad kwa goli la Reza Khaleghifar, na dakika nane baadaye, raia wa Mali, Moussa Coulibaly akasawazisha mambo. Naft haina budi kufunga orodha ya tatu bora kwa sasa ikiwa na alama 23, alama 2 zaidi ya Persepolis waliotuama katika nafasi ya nne. Gol Gohar ililazimishwa sare tasa na Naft Masjed Soleyman mjini Sirjan, wakati ambapo watengeneza magari Machine Sazi na Peykan walikuwa wanamaliza ngoma droo kwa kufungana mabao 2-2.

Basketboli: Iran yatambua mahasimu wake

Rais wa Shirikisho la Mpira wa Kikapu wa Iran amesema anatumai kuwa timu ya taifa ya basketboli ya wanaume wa Jamhuri ya Kiislamu itavuka hatua ya makundi na kusonga mbele katika Michezo ya Olimpiki ya Tokyo mwaka huu 2021. Ramin Tabatabaei alisema hayo Jumatano hii, siku moja baada ya Shirikisho la Basketboli Duniani FIBA kuchezesha droo ya timu zitakakazochuana katika mashindano hayo yanayotazamiwa kufanyika kuanzia Julai mwaka huu nchini Japan. Amesema timu ya mpira wa kikapu ya Iran inajiamini licha ya kupangwa katika kundi moja na miamba ya basketboli duniani. Siku ya Jumanne, FIBA iliipanga Iran katika Kundi A pamoja na Marekani na Ufaransa, huku timu ya nne katika kundi hilo ikitazamiwa kutoka katika migaragazano mikali baina ya Canada, China, Jamhuri ya Czech, Uruguay, Uturuki na Ugiriki. Mashindano hayo ya Olimpiki ya Tokyo ambayo yalipaswa kufanyika mwaka jana 2020 lakini yakaakhirishwa kutokana na janga la corona, sasa yatafanyika baina ya Julai 25 na Agosti 7 mwaka huu nchini Japan.  

Fainali za CHAN

Mabingwa watetezi wa Kombe la Mataifa ya Afrika kwa wachezaji wa ndani CHAN, Morocco wametwaa ubingwa wa mashindano hayo ya kibara, baada ya kuiadhibu Mali mabao 2-0 walipoposhuka dimbani Jumapili katika fainali ya aina ya kukata na shoka mjini Yaounde, Cameroon. Waarabu hao walicheza kufa kupona katika mchuano huo ili kulihifadhi taji hilo. Bao la kwanza la Morocco lilifungwa na Soufiane Bouftini katika dakika ya 69, na dakika 10 baadaye, Ayoub El Kaabi akapiga msumari wa mwisho kwenye jeneza la Eagles wa Afrika Magharibi. Kwa ushindi huu, Morocco sasa imejiungana na Jamhuri ya Kidemokrasia ya Kongo kuwa washindi mara mbili wa mashindano hayo.

Na kutia msumari moto kwenye kidonda, Issaka Samake alipigwa kadi nyekundu katika dakika za lala salama na kuzidisha masaibu na majonzi ya Mali. Huku hayo yakijiri, Guinea imeibuka ya tatu kwenye fainali hizo za CHAN 2021 baada ya kuwagaragaza wenyeji Cameroon mabao 2-0 Jumamosi usiku uwanjani Reunification. Morlaye Sylla aliifungulia Guinea ukurasa wa mabao katika dakika ya tisa kabla ya Mamadouba Bangoura kufunga la pili mwishoni mwa kipindi cha kwanza. Licha ya kucheza kwa kujituma, kumiliki asilimia kubwa ya mpira na kutamalaki mchezo katika kipindi cha pili, juhudi za Cameroon zilikosa kuzaa matunda na fataki zao kupitia fowadi Joel Ngon na kiungo Anthony Mfede zikipanguliwa kirahisi na kipa Moussa Camara.

Magongo: Kenya yapeta kiulaini

Timu ya taifa ya Kenya ya mpira wa magongo ya wanaume na ile ya wanawake zimefuzu kushiriki Kombe la Afrika kutoka ukanda wa Kaskazini-Mashariki. Hayo yalitangazwa Jumamosi na Shirikisho la Mpira wa Magongo Kenya (KHU). Mwenyekiti wa KHU, Nashon Randiek amesema Kenya na Uganda zilipata tiketi mbili zilizokuwa mezani kushiriki dimba la Afrika baada ya mashindano ya Kaskazini-Mashariki kuvutia mataifa hayo mawili pekee. “Bado hatujapokea barua rasmi kutoka kwa Shirikisho la Mpira wa Magongo barani Afrika (AfHF), ingawa tarehe ya mwisho ya timu kuingia mashindano hayo ya kufuzu ilipita Kenya na Uganda zikiwa timu za pekee kuthibitisha ushiriki wao.” Randiek alisema hayo siku moja baada ya AfHF kutangaza kupitia mitandao yake ya kijamii kufutilia mbali mchujo huo na kupatia Kenya na Uganda tiketi hizo Februari 5, 2021. Kenya na Uganda zinaungana na Misri na Afrika Kusini zilizoingia Kombe la Afrika kwa sababu ya kuorodheshwa katika nafasi mbili za kwanza barani Afrika katika kitengo cha wanaume. Ghana na Afrika Kusini zinakamata nafasi mbili za kwanza katika viwango bora vya wanawake barani Afrika. Kombe la Afrika litafanyika nchini Misri ama Afrika Kusini, mataifa mawili ambayo yana uwezo wa kuliandaa ikiwemo kuwa na viwanja vya kisasa. Mabingwa wa Bara Afrika watajikatia tiketi ya kushiriki Kombe la Dunia 2022.

Ligi ya EPL

Tutamatishe kwa kutupia jicho Ligi Kuu ya Soka ya Uingereza. Klabu ya Manchester City walipiga hatua kubwa katika kuweka wazi maazimio yao ya kutwaa ubingwa wa Ligi Kuu ya Uingereza (EPL) msimu huu baada ya kuwasasambua mabingwa watetezi Liverpool kichapo cha mabao 4-1 mnamo Jumapili usiku. Mchuano huo ulishuhudia chipukizi Phil Foden akitamba zaidi uwanjani huku masihara ya kipa Alisson Becker yakichangia pakubwa masaibu ya Liverpool wanaotiwa makali na kocha Jurgen Klopp. Ilikuwa mara ya kwanza tangu 2003 kwa Man-City kusajili ushindi dhidi ya Liverpool katika EPL ugani Anfield na ilikuwa pia mara ya kwanza kwa mkufunzi Pep Guardiola kuangusha Liverpool ugenini. Kiungo raia wa Ujerumani, Ilkay Gundogan aliwafungulia Man-City ukurasa wa mabao katika dakika ya 49 baada ya kupoteza penalti katika kipindi cha kwanza. Mohamed Salah aliwasawazishia Liverpool kupitia penalti katika dakika ya 63 baada ya kukabiliwa visivyo na beki Ruben Dias. Hata hivyo, Alisson aliadhibiwa vikali kutokana na masihara yake yalimshuhudia akitatizwa pakubwa na Foden aliyechangia bao la pili lilifumwa wavuni na Gundogan katika dakika ya 73 kabla ya Sterling kufunga la tatu dakika tatu baadaye. Foden ndiye aliyezamisha kabisa chombo cha Liverpool katika dakika ya 83. Ushindi kwa Man-City uliwadumisha kileleni mwa jedwali kwa alama 50, tano zaidi kuliko nambari mbili Manchester United. Huku City wakikwea kileleni, watani wao Manchester United walikuwa wanaisagasaga Southampton mabao 9-0 Jumanne usiku. Hii ilikuwa mara ya pili kwa Southampton, almaarufu The Saints, kutoa ndani magoli tisa bila jibu katika muda wa miezi 16; baada ya kulishwa kichapo sawia na hicho na Leicester City mnamo Oktoba 2019. Katika mchuano huo wa Jumanne uwanjani Old Trafford, wageni walilishwa kadi nyekundu dakika ya pili ya mchezo na kuwapa United fursa nzuri ya kumimina mabao manne kabla kwenda mapumzikoni. Katika michuano mingine ya EPL iliyoshuhudiwa hivi karibuni, Tottenham Hotspurs ilipokezwa kichapo cha 1-0 na Chelsea mnamo Februari 4. Chelsea waliendeleza rekodi yao ya kutoshindwa chini ya mkufunzi mpya Thomas Tuchel na ushindi dhidi ya Spurs uliwapaisha hadi nafasi ya sita kwenye msimamo wa jedwali la EPL. Tottenham iliibamiza West Brom mabao 2-0, wakati ambapo Chelsea ilikuwa inaicharaza Sheffield United mabao 2-1. Mchezo wa Leicester na Wandarer uliishia kwa sare tasa. City wanaongoza jedwali la EPL kwa alama 50, wakifuatiwa na Man U wenye alama 45. Leicester wanafunga orodha ya tatu bora kwa alama 43. Liverpool na Chelsea wanafuatana katika nafasi za nne na tano kwa alama 40 na 39 kwa utaratibu huo.

…………………..TAMATI.…………….