Pakistoni sərhəddi kontrol əkə heyət bə İroni Sistan və Bəluçıstan ostan səfər kardən.
Çı Pakistoni sərhədd kontrol əkə heyət İronədə de Sistan və Bəluçıstan ostani rəsmi şəxson vindemon kardən.
Im vindemonədə İroni Sistan-Bəluçıstan ostani yol Daniyal Mohebbi de Pakistoni Bəluçıstan ıştati sərhəddiyə ğıvvon yol Tareğ Əman vindemonış kardə və votışe: iğtisodi və iştimaiyə həmkarion ijən əmniyyəti bərpo karde İron və Pakistoni miyono əloğəon xusosiyətonku hisob bedə ki bəbe ım zərfiyətiku istifodə kəmon.
Mohebbi bə hamsuyə kişvəron miyono həmkarion və dustiyəti təkidış kardə və votışe: İron və Pakistoni şəhron miyono pər xəton bərpo karde siyasi, mədəni və iğtisodi əloğəon həminə cəhdonku hisob bedə.
Tareğ Əman həm təkidış kardə ki İron və Pakistoni miyono sərhəd çı sulh və dustiyəti sərhədd ki 2 tərəf həmişə bə ım sərhəddi əmniyyət təsdiğ kardən.
Xəbə omə ki ım səfəri cərəyonədə İron və Pakistoni miyono de ğaçağçiyon, noəmnion və terroriston mubarizə bardero qıləy mıştərəkə həmkari mığovilə imzo be.
