Zəvvaron bə Həcc ziyarət dəro qınidən

"Həcc ziyarətədə mısılmonon eyni vaxtədə i vırədə cəm bıe ğeyr-əz mənəviyyati, diqər barzə məğsədonşən heste. Mısılmonon arədə vəhdət, rabitə, umumən isə İslami umməti bə meydon beşe həmonə muhummə məğsədonədəy."

Im sıxanon Ali Rəhbər Ayətullah Seyid Əli Xamenei de Həcc ziyarəti təşkil kardə rəsmi şəxson vindemonədə votəşe. Ali Rəhbəri ımən ğeyd kardəşe ki, bəzi nodon və ğərəzkorə insonon bə cıvonə nəsli dini çe siyasətiku co bıe təbliğ kardedən. Hərçənd ki, Həcc ziyarət məhz dini de siyasəti vəhdəti əmələdə nişon doe ro qıley fırsəte. Im ziyarət din və siyasət, dınyo və axirət, mənəviyyat və maddiyyəti bə yəndı obaste nişon doe ro qıley əməli meydone.

Az.R-ku bə Həcc şə zəvvaron iminə qrup avğusti 11-ədə de həvopeyma bə Ərəbıston dəro qıniən. "Maide.az" xəbə dodə ki, ımsor çe Respublikaku zəvvaron miğdar 1440 nəfəro ibarəte. Çəvonədə 30 nəfər bə ım ziyarət təkrar şəkəsonin. Əvon əlavə bəpe 535 dollar avjor bıkon. İmsor Həcc ziyarəti ğıymət 4150 dollari ğədərədəy.

Zəvvaron tosə avğusti 15 de 8 qılə reysi bə ziyarət dəro bəqınen. Çəvon oqarde sentyabrə manqi 1-ku tosə 4-y nəzərədə qətə bedə.