Xariçi şirkəton Az.R tərk karde səbəb çiçe

Prezident İlham Əliyevi de tojə sori münasibəti Azərbaycani xalq təbrik kardışe. Bardə islahaton nəticədə iğtisadi sahədə hətto bə 5% -nə inkişafi nail be votışe. Əmo prezidenti votəyon de real vəziyyəti arədə həmişə fərğ bıə. Isətən jəqoe.

Əqər Az.R-ədə investisiya mühit hestebu, iğtisadiyyatiku səmərə bə dast varde mümkünebu, bəs xarici şirkəton ki, çand sorone, məmləkətədə fəaliyyətşon heste, boçi ıştə biznesi çiyo dəparçınidən? Boçi azərbaycanıjon ıştən bə Türkiyə, Gurcistan, hətto bə Rusiya iğtisadiyyati investisiya nodən?

Orəxnə 2 soron dırozi ki, iğtisadi behran bino bıe, hokuməti elan kardə islahat cəhdon  həmə imitasiya tədbiron bin. Navko çoko məmləkətədə məmuron ıştənbəsəti, rışvəxorəti, korrupsiya tiğon kardedəbe, vəziyyət ısətən ım cürey. Monopolyon navkoən daxili və xarici siyasəti həmə sahon bəştə inhisar səşonbe, ısətən Prezidenti nezə odəmon həmonə monopoliya sədə nıştən, məmləkətədə bə azad rəğabəti, bə azad biznes fəaliyyəti imkan dodənin. Prezidenti bə rayonon təyin kardə icra hakimiyyəti sərdaron ısətən fermeron ğarət kardə əməlonku dast kəşedənin və nə Prezident Adminstrasiya, nəən devləti hüğuğ mühafizə orğanon bə çəvon bı ğeyri-ğanuniə hərəkəton hiç qıley əncom kəşe fikir nişone. "Azadlıq.info" sayt nıvıştedə ki, Az.R -ədə bo biznes onoe ro hiç qıley stimul ni. Hokuməti bo biznes fəaliyyəti ro imkanon tamam məhv kardəşe.  De ım komanda ki, hakimiyyətədey, həni məmləkəti xilas karde mümkün nıbə koe. Şəhrvandon, həmən xarici biznesmenon ımi oşko vindedən, məmləkəti tərk karde, ıştə sərvəton çiyo bekarde ro imkan nəvedən.