Boku dıvlət tələbış karde: məntəğədə sulhi xoto bəpe i bıə milləton təşkilati ğətnoməon icra bıbu.

Azərbaycon Respublika xarıci vəzir votışe: bo məntəğə sulhi bərpo karde yeqanə roy Ğərəboği mınoğişə barədə i bıə milləton təşkilati ğətnoməon icra kardeye.

Bə İrna raporti əsos, Ceyhun Bayramov zinə Bokuədə de Macarestoni xarici vəzi Piter Siyartovi vindemonədə əlovəş karde: bə i bıə milləton təşkilat iyən co beynəlxalğ onemonon ğətnomə və bəyaniyəon əsos Ermanion bəpe Ğərəboğ və çəy ətrofədə bıə 7 qələ şəhron tərk kə.

Bayramov, Ermanistonış bə işğalçiyəti mıttəhəmış karde və əy məntəğədə behron vəziyəti icod karde əmil bə hisobış varde.

Əv votışe: Ğərəboği mınoğişə barədə beynəlxalğ ğətnoməon icra bəni iyən çəy halli barədə 2 curnə standardon muşahidə bıdə.

Azərbaycon Respublika xarıci vəzir ijən təkidış karde: 30 sor bəbe ki çəmə zəmin Ermənion tərəfo işğal bıə ki ım çı məntəğə no oroməti iyən qəvonəti amile.

Macarestoni xarici vəzi Piter Siyartovi həm Ğərəboği mınoğişə barədə bə sulhin roon ijən bovəmandəti təkidış karde və votışe: əmə çı Azərbaycon Respublika ərazi təmamiyyətiku himoyədorəti kardedəmon.

Ğərəboği Tovuz sərhəd məntəğədə Azərbaycon Respublika iyən Ermanistoni miyono tojə dıvrə daveon ki Davərdə haftəku bino bıə hələ həm dəvom kardedə iyən çandə tələfoti bois bıə.

Azərbaycan Respublika və Ermənistoni miyono Ğərəboği barədə davoon 1988 nə-soriku bino be və 1992-nə sorədə bə hərbi navi qəte iyən otəş bast muvafiğ omə.

Im canqi nəticəku Ermanistoni hərbion çı Azərbaycan Respublika Ğərəboğ məntəğə iyən 7 qılə hamsuyə şəhrestanon işğal kardeşone.