İron bə Azərbaycan Respublika iyən Erməniston notaş do, bə İroni sərhəddon harcurnə təcavuz-həmlə tov vardənin ni.

İroni xarıci vəzarətxonə sıxanəvot bə Ğərəboği mınoğişədə bıə tərəfon notaş do ki İroni bəştə sərhəddon zidd bıə harcurnə təcavuz-həmlə tov nibəvarde.

Səid Xətibzodə Ğərəboği daveon cərəyonədə işterakəkəyon tərəfo bə İroni sərhədd məntəğəon çand kərə rəket ğandey barədə votışe: sərhədədə şərayet de ciddi iyən komilə həssasiyəti İroni tərəfo manitorinq bıdə.

Xətibzodə jəğonə təcavuzon ğəbul nıkardənin bə hisobış varde iyən təkid kardışe ki mınoğişədə bıə tərəfon bəpe bə İroni sərhəddi ehtıron karde çərçivədə bəştə problemon həlli fik kon.

İroni xarıci vəzarətxonə sıxanəvot ijən Azərbaycan Respublika ərazi təmamiyyəti oqəte, ğeyri hərbion coni hifz karde, daveon sə bey iyən sulh muzakirəon bino bey işarə və əlovəş karde ki İron ım prossesədə komək karde bəzne.

Ğərəboği mınoğişə cərəyanədə bıə Azərbaycan Respublika iyən Ermənistoni miyono canqi dəvomi nəticədə çandə rəketon bə İroni sərhədd məntəğəon qıniye İroni ım ciddi nota bois bıə, xəbə omə ki İroni Xodafərin sərhəd məntəğədə qıləy 5 sorə hırdən həminə rəket həmləonədə zəxmin bıə.