İ. Əliyevi 2017-minə sor Az.R -ədə İslami həmrayəti sor elan kardışe

Prezident İlham Əliyevi bə dəvardə sori yekuni dair Naziron Kabineti içlas dəvunişe. Həmonə iclasədə islam aləmi vəhdəti çanədə mühüm be ğeyd kardışe, elan doşe ki, 2017-minə sori bənə İslami Həmrayəti dəbəvuniemon.

Əlbəttə ki, jıqo təşəbbüs bə tarif və təğdiri layiğinə koe. Həmən ki, ım sor məmləkətədə İslami Həmrayəti hənəkon dəbəvarde. Az. R de jıqo təşəbbüson bə həmə İslami dınyo nümunə nişon dodə ki, islami məmləkət və xalqon de yəndı sülh və mehriban münasibətonədə jimon bıkon.

Əliyevi ım təşəbbüs təhlilqəron arədə bə müxtəlif fikron səbəb bıə. Müxalif fikirədə bəkəson votedən ki, çey elan kardə soron həmişə əks nəticə doəşe. 2014-minə sor di təsərrüfat sor elan kardışe. Əmo təsərrüfati ım sahə ısət anədə tənəzzül kardəşe ki, bo əhali zəruri ərzağ məhsulon vey yolə hissə, hətto moğnən xarico vardedən. Bə 2015-minə sori multikulturalizmə sor nom noşe. Bı sorədə bə Nardarani, həmən diqər məntəğə dindaron vey beəmonə divon qətışe. Dini şüaron, dini pərçəmon, hətto bə əhali ıştə kəonədə dini mərasimon dəvunie, ehsanon doe ğədəğən kardışe. Devləti qerbədə de ərəb qrafika nıvıştəy be-be, əhali səpe  ım əlifbaku istifadə qorə yolə cərimə noşe. İlham Əliyevi hokumət məmləkəti şəhəronədə əzon, məktəbonədə hicab ğədəğən kardışe. Zindonədə əzob kəşə 160 nəfər siyasi məhbuson 100 nəfərisə vey dini fəalonin.

Prezidenti 2017- minə sori de İslamə Həmrayəti nomi siyasət barde, bo məmləkəti əhali qaspu jıqo qıley xeyr bıboşe ki, əv bə dindaron münasibətədə repressiya hərəkətonku dast bıkəşo, zindonədə əzob kəşə beqınoə dini fəalon azad bıko. Bəvədə bəbe vote ki, Əliyev həğiğətən  bə islami dınyo həmrayəti dılısoxt tərəfdare.