Prezidenti minimum məvacib 11 mənot ziyod kardışe

Yanvari 21 -ədə İlham Əliyevi fərman doşe ki, məmləkətədə minimum məvacibon 11 mənot ziyod kardə bıbo. Demiən ən kamə məvacibi məbləğ məmləkətədə 116 mənot bəbe. Prezidenti orəxnə jıqo fərman 4 sor çimi bə nav doəşbe ki, bəvədə minimum məvacib 11 mənot 50 kopiq vey kardəşbe.

"Azadlq.info" nıvıştedə ki, Az.R bə Avropa Sosial Xartiya ğol kəşəşe ki, minimum məvacibi məbləğ miyonə manqə məvacibi 60% -i ğədər bənine.  Im məbləğ  ısət 493 mənote. Jəqo minimum  məvacibi məbləğ 296 mənot bənine. 2004-minə sori " Jimonə minimumi həxədə" ğanun ğəbul kardışone, bə ğanunədə ım tələb nıvıştə bıə. Əmo bı dəvardə soron Boku hokumət hiç vaxt həmonə tələb bə vırə rosnie zınəş ni. Anədə təbii sərvətinə məmləkətədə minimum məvacibi miğdar ətrof hamsuə devləton həmeysən jinə mevğeyəde.

İlham Əliyev ıştə votemononədə həmişə iğtisadi inkişafiku qəp jedə. Əmo əhali quzərani səviyyə daima saru eqınie, çimi təmomən əksi nişon dodə. Mənoti bə dollari nisbətən məzənnə erjon be, iğtisadiyyatədə tənəzzüli dəvom karde qıley nışonəy. Im bə infilyasiya dəvomi, ğıyməton rujbəruj boho be, prezidenti bo əhali ço kardə həmonə 11 mənoti bə monopoliston çif ru be səbəb bedə. Çok əbıniki, prezident monopoliyon vəy se ro müvafiğ və konkret qəmon şodo, bı barədə bə Parlamenti lazımi ğanunon ğəbul be ro ıştə təklifon bıvğando?

Azərbaycan prezident respublika be səbəbiku iyo Prezidenti yolə səlahiyyəton hestışe. Bə qorə məmləkətədə devləti bardə iğtisadi  və sosial siyasəti  məsuliyyətən hejo çey səpeye.