İlham Əliyevi de Avropa Parlamenti sədri vindemoniku imtina kardlşe
Fevrali 6-ədə prezident İlham Əliyevi Brusselədə de Avropa İttifaği Şura prezident Donald Tuski və Avropa komissiya prezident Jan Klod Yunkeri vindemon kardışe. Tərəfon bə ım vindemoni barzə əhəmiyyət doşone ki, əv çe Az.R və Aİ arədə həmkarəti həniən inkişaf karde koməq bəkarde.
Əmo «Human Rights Watch» beynəlxalq bəşəri huğuğon təşkilati bə Cənubi Ğəfğazi dair direktor Giorgi Gogia "EUobserver" rujnomədə Aİ-ış Az.R -ədə bə demokratiya prinsipon əməl nıkarde fakti məhəl nınoeədə qınokar zınə.
Həmonə ruji Avropa Parlamenti sərdar Antonio Tayani de Əliyevi vindemon nəzərədə qətə bedəbe. Əmo Azərbaycani tərəf imtina karde səbəbiku ım tədbiri sə nıqətışe. Avropa tərəfi ım jıqo izah kardəşe ki, Avroparlamentədə Az.R -ədə bə bəşəri huğuğon darışte dair de sabiğ siyasi məhbuson Emin Milli və Xədicə İsmaili iştiraki debat dəvarde səbəbiku Əliyevi de Tayani molağat barde piəş ni.
Bı debatədə Azərbaycani tərəfiku iqlə Emin Milli iştirak kardəşe. Bə Xədicə İsmaili Boku hokuməti çe Az.R -ku bə xaric şe ğədəğən karde səbəbiku əv de "Skayp"i vasitə qəp jənin bıe. Əmo çey internetşonən ğət karde. Bə qorə çey iştirak ım mumkun bıə ni.
Huğuğ mudafiəçi Leyla Yunusi bə "Azadlıq radiosu" votəşe ki, Az.R -ədə 160 nəfər siyasi məhbuson siyahi bə Avropa Komissiya doəşone. Əvon həmonə siyahi bə Əliyevi təğdim karde nəzərədə qətəşonbe. İlham Əliyevən ımi yəğin zınedəbe, bə qorə həmonə vindemoniku imtina kardəşe.
