İroni səfir: Azərbaycan Respublika iyən Erməniston Respublika miyono votımonon iyən sulhi təşəbbusiku, Tehron himoyə kardedə.
Azərbaycan Respublikaədə bıə İroni səfir votışe: Azərbaycan Respublika iyən Ermənistoni Respublika miyono votımonon iyən sulhi cari təşəbbusiku, Tehron himoyə kardedə.
Bə İSNA aqentiyəti raporti əsos, zinə rujədə, Azərbaycan Respublikaədə bıə İroni səfir, Sed Əbbas Musəvi jurnaliston qırdədə Ğərəboğədə işğal bıə məntəğəon ozodiku iyən Miladi 2020 minnə sori Noyabrə manqi 10 minnə ruji 3tərəfiyə bəyoniyə icra beyku ıştə rizoyəti elanış karde iyən təkidış karde: Təğribən 30 sor bəbe ki İron bənə Azərbaycan Respublika bə Nəxcəvani mıstəğilə Respublika dəçokney və şe-omeyro İron bənə vey muhimmə tranzit be, və ım roy ki de Azərbaycan Respublika rəsmi şəxson həm ğədrdonəti ğərorış qətə be həmçınan Azərbaycan Respublika iyən Nıxcəvani mıstəğilə Respublikaədə bənə vey muhimmə roy bıvəon iyən hovəon tərəfo istifodə bıbe.
Musəvi ijən əlovəş karde: İron İslam Respublika məntəğə tojə həğiğəton dərk kardedə əmmo etığadış heste ki har məntəğə plan bəpe de məntəğə həğiğəton həl bıbu.
Zinə ruj təğribən 160 nəfər əcumlə rezidenton, non-rezidenton, hərbi vabəstəon iyən Bokuədə sakin bıə beynəlxalğə təşkilaton nımoyəndəon və bə Ğərəboği 2minnə canqiku bəpeşt oxonə təhəvulaton neziku oşno bey xoto, ozod bıə şəhronku bənə Fozoli, Şoşa və Laçin kridor (bə Ğərəboği mərkəz yəni Xankəndi rəsey Ermənistoni roy)ku vindemonışon karde.
Im vindemonədə ki Azərbaycan Respublikaədə bıə İroni səfarətxonə hərbi vabəstə iyən səfir həm iştirokış be, xarıci siyasəti koonədə Azərbaycan Respublika prezidenti muavin, Hikmət Haciev və Ğərəboği məxsusə məntəğəonədə Azərbaycan Respublika prezidenti məxsusə nımoyəndəon de Ermənistoni bə stabilə sulhi dast peydo kardeyro siyasi votımonon, tranziti roon dəbastey məhv kardey, mina peqətey iyən obod kardeyro votımonışon karde.
Səvet ittifoği suğuti cərəyonədə və de İrəvani himoyə çərçivədə, Ğərəboği məntəğə, Azərbaycan Respublikaku co bıə.
Im co bey Miladi 1990 minnə sorədə iminnə canqi bois bıə ki çəy cərəyonədə, 30 həzo nəfər kıştə iyən sa həzo nəfər həm avarə bin.
Həmçınin Miladi 2020 minnə sorədə Paizə manqədə co qılə dave həm bino bıə və 6 haftə mıddətədə, 6 həzo 500 nəfər kıştə bıən.
Həminə cərəyoni oxoədə Erməniston məcbur bıə 3 qılə məntəğə bə Azərbaycan Respublika bıdə.
Ğərəboğədə Azərbaycon Respublika iyən Ermənistoni miyono tojə dıvrə daveon Sentiyabrə manqi 27 ku bino bıə be ki oxoy sə Rusiyə, Azərbaycan Respublika iyən Erməniston Noyabri 10 ım dıvrə canqi səkardeyro qıləy mıştərək sazışi imzo kardışone.
