İ.Əliyevi məmuron çey dəsturon çı cür icra kardedən

Yanvarə manqi 30-minə ruji İlham Əliyevi bə 2016 -minə sori yekunon dair konfrans dəvinişe. Əyo ğeyd kardışe ki, məmur çe xalqi xidmətədə mandənine, bəpe de rışvəxorəti, ğarətkarəti məşğul nıbo, xudpəsəndəti nıko, təvazekar, numunəvi bıbo. Ey bə ıştə məmuron jıqo çəşnavi karde iminə kərə ni, nafkonə vaxtonədən bı məzmunədə bə vəzifədaron tars ehaştə votemononış bıə. Əmo çey ım çəşnavion hiç qıley foydəşon bıə ni.

Prezident daima islahaton, inkişafi həxədə qəpon jedə, əmo məmləkətədə vəziyyət har tərəfədə şe-şe həniən qıvonin bedə. məmuron ıştənbəsəti ijən dəvom kardedə.

"Politika.az" sayti fevrali 12-ədə, yəni prezidenti həmonə çəşnaviku 2 həftə bə diqə Yardımli İcra sərdar Araz Əsqərovi çe əhaliku pul qırdə karde barədə xəbə doşe. Iştənən həmonə rayoni məmuron votedən ki,  ım çe  Prezident Adminstrasiya dəsture ki, budcə təşkilati har koəkə ıştə maaşədə 43 mənot bə İcra Hakimiyyəti doənine. Çe PA-ku bı məsələ hiç qıley reaksiya nıbe nişon dodə ki, məqəvuji hejo məsələ həğiğətən jıqoe. Bəs İ.Əliyevi votə sıxanon mənaş çiç be?

Cıvonon və vərzeşə vəzarəti nazir Azad Rəhimovi bə jurnaliston votəşe ki, İslamə Həmrayəti Hənəkonədə 50 qılə devləti ıştə iştirak təsdiğ kardəşe. 7 qılə məmləkəti ki, maddi səbəbiku iştirak kardeədə problem hestışone, Az.R çəvon xarcon bə ıştə ehdə pebəqəte və həmə islamə devləton ım Hənəkonədə iştiraki təmin bəkarde. Devləti budcədə nirəsəy bıə vaxtədə ım ğədər əlavə xarci çı konco bə dast varde Rəhimovi votəş ni. Əmo hiç kəsiku şubhə ni ki, hokumət ım puliən bənə Avropa Hənəkon xarci çe xalqi cifiku bebəkarde. Hejo Yardımli rayoni icra sərdari de PA nomi şəhrvandon məvacibi i hissə cəvon dasto se bə ım ğarətkar siyasəti dəvom karde qıley subute.