Bə Ğərəboği sulh muzakirəon umidvar mande ni bəbe.

Azərbaycan Respublika xarıci vəzir bə Ğərəboği sulh muzakirəon ijən omə manqədə de Ermənistoni xarıci vəziri mılağat karde nəticəon bədbine və omidvar ni.

Bə Trend aqentiyəti raporti əsos Elmar Muhəmmədyarov jurnaliston cəmədə votışe: Azərbaycan Respublika dıvlət omə manqi muzakirəon be foydə zıneydə və bə Moskvodə bıə 2 qılə kişvəri xarıci vəziron miyono mılağaton hiç omidış ni.

Əv əlovəş kardə: Ermənistoni ğeyri ğanuniyə rəftoron ım bədbini və omidvar ne mande illəte və boiys bıə ki Buko dıvlət bə Ğərəboği sulh muzakirəon anə omidvar məbu.

Avropa həmkari və əmniyyət təşkilati rəis həm tojədən elanış karde ki Ğərəboği məntəğədə cariyə vəziyət çok ni və niqəran əkey.

Bə İrna raporti əsos Avropa həmkari və əmniyyət təşkilati parlemantiyə iclosədə Lamberto Zaniyeri bə Monhenədə ıştə tojə didor və mıloğaton de Erməniston və Azərbaycan Respublika xarıci vəziron işorəş karde və votışe: dəvardə sorədə Ğərəboğ məntəğədə hərbiyə daveon bə vıcud omə ijən ımsor həm çandə qonə silohon məntəğədə heste ki yəğin ğeyri hərbion kışte boiys bəbe.

Ğərəboğ bandiyə məntəğə barədə daveon ısət bə 30 sor nızi heste ki bino bıə və çandə Minsk qrupədə bıə Amerkə, Rusiyə və Fransə mıştərəkə bərnaməon bo ım bohrani həl kardero detosə ısət hiç foydəş ne be.