Suriyədə de terroriston Amerkə həmkoətionku, Tırkiyə tənğid

Tırkiyə prezidenti sıxənəvot Suriyə şimol məntəğəonədə de terroristiyə təşkiloton Amerkə həmkoəti barədə, bə ım kişvər notaş do.

Bə Tele-Rədio aqentiyəti raporti əsos, Tırkiyə prezidenti sıxənəvot, İbrahim Kalin Suriyədə terroristiyə qruponku Vaşenqtoni himoyəon məhkumış kardə və votışe: bə Amerkəvıjon rəsmi şəxson elan kardemone ki Suriyə şimol məntəğəonədə de terroristiyə təşkilaton ım kişvəri həmkoəti, de 2 qılə kişvəri miyono koalisiya rabtış ni.

Kalin ijən işorəş karde ki tosə ısət Tırkiyə Natoədə İsveçi uzv bey barədə oxonə ğərorış qətə ni, əv ijən əlovəş karde: həmmə çi bə Stokholm hərəkəton vabəstəy.

Tırkiyə prezidenti sıxənəvot ijən votışe: Amerkə bəpe Natoədə Finlandiya və İsveçi uzv bey bə ım kişvəriku Ankara F-16 ğırəkə təyyorəon rabt nıdo.

Kalin ijən təkidış karde: ehanə Amerkəku Ankara F-16 ğırəkə təyyorəon hıryero problemoni icod bıbu, Tırkiyə co kişvəronku ım ğırəkə təyyorəon hıryero co qılə intixobonış heste.

Milodi 2023 minnə sori Martə manqi əvvəliku, Amerkə senatoronku qıləy qrup bə ım kişvəri prezident Co Bayden təklif dodən ki tosə zəmoni ki Natoədə İsveç və Finlandiya uvz bey Ankara səmtiku təsdiğ məbu, bə Tırkiyə F-16 nomo bıə ğırəkə təyorəon həvoteədə təxir bıbu.