Erməniston marzədə bəzi məntəğəon hukm kardey barədə, Azərbaycan Respublika iddio

Tojədən Azərbaycan Respublika mudafiə vəzarətxonə xəbəş do ki Azərbaycan Respublika və Ermənistoni marzədə bəzi məntəğəon kontroli bə dastış qətə.

Milodi 2022 minnə sori Dekabrə manqi 12 minnə rujədə, Azərbaycan Respublika Laçin koridori dəbastey bino, və bandiyə Ğərəboği mıhosirəş kardə. de ım vucud ki humanitar təşkilaton vey kərə bə Ğərəboği milləti vəziyəti qıvonin bey xoto notaşon doə, əmmo Boku rozi nıbıə ki laçin karidori iyən caddə oj bıko.

Həminə məsələ ki de ekoloqiya fəalon vositə əncom bıə bois bıə ım məntəğə Ermənion sakin bıə kəson de sutemon və xorək maddon kam bey dim bə dim bıbun.

Bə Mehr aqentiyəti raporti əsos, Azərbaycan Respublika mudafiə vəzarətxonə iddioş kardə de Ermənistoni ım kişvəri marzonədə bə hevujə məntəğəon əcumlə muhimm və ğeyri muhimmə roon hıkm bıko.

Azərbaycan Respublika həminə iddio qıləy holədə bəyon bıə ki tosə ısət Erməniston bəy rəsmiyə reaksiya nışoş do ni.

Buko iyən İrəvani miyono daveon əlovə bey dumoədə, Rusiyə mudafiə vəzarətxonə, Azərbaycan Respublika mıttəhəmış kardə ki Miladi 2020 minnə sori Azərbaycan Respublika və Ermənistoni miyono canqədə ki de Rusiyə kişvəri vositəçiyəti bə otəşbasti təvafuğ rəsəş be, həminə otəşbasti darşiyəşe.

Moskva elanış kardə be ki Rusiyə sulh mərominə ğıvvon təhrikomizə hərəkəton və daveon əlovə bey vəy qəteyro tədbironi əncom bədon.

Dəvardə haftədə həm Ermənistoni iminnə vəzir, Nikol Paşiniyan notaş do ki Azərbaycan Respublika tərəfo beynəlxalğə təvafuğon darşiye be ım ki əvoni cəzo bıdən, Buko bə tojə rəhrikomizə hərəkəton əncom doey təşviğ bəkarde.

Milodi 2020 minnə sorədə Ğərəboği 2minnə canqi bəpeşt, ki de Rusiyə vositəçiyəti nəhayətədə bə otəşbasti təvafuğnomə rəsə, məntəğədə Buko iyən İrəvani miyono otəşbasti kontroliro 3 tosə 6 həzo Rusiyə sulh mərominə ğıvvon sakin bey bois bıə, qıləy holədə ki dəvardə 30 manqədə ım otəşbast çand kərə darşiyə bıə.