Erməniston və Azərbaycan Respublika mıtəğabilə artileriya həmləon
Zinə Seşəmbə əsrədə, Azərbaycan Respublika iyən Ermənistoni marzi hərbiçion bə yande səmt artileriya həmləon əncom doşone.
Bə İsna aqentiyəti raporti əsos, Ermənistoni mudafiə vəzarətxonə qıləy bəyoniyədə elanış kardə: Seşəmbə rujədə, təğribən saət 16, Azərbaycan Respublika hərbiçion bə Erməni əsqəron səmt ki Tiğ di ətrofədə muhəndesi koon əncom doey holədə bin qullə ğandışone ki çəy nəticədə 3 nəfər Ermənionku kıştə və çand nəfər çəvonku zəxmin bıən.
Ermənistoni mudafiə vəzarətxonə bəyoniyədə omə: ım kişvəri hərbi ğıvvon həm, həminə həmləon cəvobədə, Azərbaycan Respublika marzi hərbiçion ıştə artileriya həmləon hədəf ğəror doşone.
Həmçınin Erməni mediyaon elanışon kardə ım marzi daveon cərəyonədə Ermənistoni ərtışi məxsusə Sepah komandir Armen Qiyozaliyan həm zəxmin bıə.
Həmzəman, Azərbaycan Respublika mudafiə vəzarətxonə həm qıləy bəyoniyədə iddioş kardə: bə Ermənistoni təhrikomizə hərəkəton xoto, daveon həmçınan dəvomış heste və veyə zərəl-ziyonon bə Azərbaycan Respublika hərbiçion varid bıə.
Azərbaycan Respublika mudafiə vəzarətxonə həmçınin ım kişvəri hərbiçionku çand nəfəri zəxmin və kıştə beyku xəbəş do.