İroni de Azərbaycan R. reylsi xətton mıbodiləon 63 fayiz ozavziyə

İroni şimol məntəğə 2 nomo reyls xətton mudir, de Azərbaycan Respublika İroni reyls xətton mıbodiləon 63 faiz ozavziyəku xəbəş do.

İroni şimol məntəğə 2 nomo reyls xətton mudir, Ğolam Huseyn Vələdi, xəbəş do ki Ostoro marzi terminalədə şələ tranzit iyən varid bey və ixracati ozavziyə bə 63 faiz mığdor rəsə.

Bə roy iyən şəhr dutey xəbəiyə mərkəzi raporti əsos, İroni şimol məntəğə 2 nomo reyls xətton mudir votışe: tosə 1402 minnə sori Mordadə manqi əvvələ rujon, de Azərbaycan Respublika kişvər Ostoro reyls xətton terminalədə 226 həzo ton əmtəə mıbodilə bıə ki 1401 minnə sor yəni dəvardə sori muğaisədə 63 faiziku vey əlovə bey nışoş do.

Vələdi 1402 minnə sori 4 manqədə əmtəə reyls xətton varid bey mığdor, 69 həzo 455 ton elan və əlovəş kardə: ım miğdor, dəvardə sori muğaisədə təğribən 114 faiz əlovə peydoş kardə.

İroni şimol məntəğə 2 nomo reyls xətton mudir ijən əlovəş kardə: ımsori 4 manqi əvvələdə Ostoro reyls xətton terminaliku 68 həzo toniku vey əmtəə ixrac bıə və təğribən 88 həzo ton əmtəə həm tranzit bıə.

Vələdi ijən votışe: Sitrus mivəon, sement, kimyəvi maddon, kafel iyən xorək maddon əcumlə ixrac bıə məhsulonin ki İroni reyls xəttonku bə Azərbaycan Respublika ixrac bıə və taxta və mərcimək həm əcumlə vey muhimmə tranzit və varid bıə məhsulon bə hisob omeydən.